Report.az
Azərbaycan avarçəkənləri "Prezident Kuboku-2025" beynəlxalq turnirinin ilk günündə 3 medal qazanıblar.
"Report"un yarışa ezam olunan əməkdaşının məlumatına görə, bu gün Suqovuşanda kayak üzrə 200 metr məsafədə mükafatçılar müəyyənləşib.
Azərbaycan təmsilçilərindən Amil Ramazanov 2007-2008 təvəllüdlü idmançıların mübarizəsində bürünc mükafata sahib çıxıb. 2009-2010 təvəllüdlü idmançılardan Əlimurad Hacızadə, 2011-2012 təvəllüdlülərdən isə Mustafa Vəlizadə eyni əyarda medal qazanıblar.
Qeyd edək ki, "Prezident Kuboku-2025" turnirinə Azərbaycan təmsilçiləri ilə yanaşı, Estoniya, Gürcüstan, Almaniya, Yunanıstan, Macarıstan, Hindistan, Qazaxıstan, Qırğızıstan, Latviya, Litva, Moldova, Polşa, Serbiya, Cənubi Afrika Respublikası, İspaniya, Tacikistan, Türkiyə, Ukrayna və Özbəkistandan olan avarçəkənlər qatılıblar.
Reqata mayın 1-2-də Mingəçevir "Kür" Olimpiya Tədris-İdman Mərkəzində davam edəcək. Burada komandalar avarçəkmənin kayak, kanoe və akademik növündə müxtəlif məsafələrdə mübarizə aparacaqlar.
