Turan Bayramov: “Medalsız qayıtmayacam”

"Paris-2024 Yay Olimpiadasından sonra ilk yarış başlayır".

Bunu İdman.bizə Azərbaycan millisinin cüdoçusu Turan Bayramov (60 kq) deyib.

O, Xorvatiyanın paytaxtı Zaqrebdə keçiriləcək Qran-pri barədə danışıb. Bayramov bildirib ki, yeni lisenziya xallarını yığmağın artıq vaxtıdır: "Olimpiadada iştirak etmədim, lakin bu, sonuncu dünya çempionatımdan sonra ilk yarışım olacaq. Hər şey geridə qaldı. Yeni səhifə açmaq lazımdır. Bu, idmandır. Yarışdan gözləntilərim böyükdür. Bir çoxları Olimpiadadan sonra bu yarışı zəif hesab edə bilər. Lakin, belə deyil. Çox güclü rəqiblər bizi gözləyir. Hamısını tanıyıram. Bütün rəqiblərimi analiz etmişik".

Cüdoçumuzun sözlərinə görə, qarşıdakı yarışla bağlı yüksək səviyyədə hazırlıq keçirlər: "Təlim-məşq toplanışlarında iştirak edərək həm texniki, həm də taktiki baxımdan özümüzü gücləndiririk. Medalsız qayıtmayacam. Hədəflərim daha da böyükdür. Yolumuza yenidən başlayırıq. Bundan sonra qarşıda 4 il var. Əlimdən gələni edib bütün yarışlarda yaxşı nəticə göstərəcəm".

Qeyd edək ki, sentyabrın 13-15-də keçiriləcək turnirdə ölkəmizi Turan Bayramovla yanaşı, Əhməd Yusifov (60 kq), Ruslan Paşayev, Nazir Talıbov (hər ikisi 66 kq), İbrahim Əliyev, Nəriman Mirzəyev (hər ikisi 73 kq), Ömər Rəcəbli, Zaməddin Poladov (hər ikisi 81 kq), Vüqar Talıbov (90 kq) və İmran Yusifov (+100 kq) təmsil edəcək.

Banuçiçək Hüseynli
İdman.biz