İdman.biz
"Dünya çempionatı olduqca yaxşı keçdi".
Bunu İdman.bizə yunan-Roma güləşi üzrə Azərbaycanın U-17 millisinin böyük məşqçisi Taleh İsrafilov deyib.
O, İordaniyanın paytaxtı Ammanda keçirilən dünya çempionatında komandasının çıxışını dəyərləndirib. Təcrübəli mütəxəssisin sözlərinə görə, qızıl medal qazanan Turan Daşdəmirov (51 kq) və Ayxan Cavadov (60 kq) formada olduqlarını nümayiş etdiriblər: "Yarışda çox güclü güləşçilər var idi. Görüşlər çox gərgin keçdi. Yığmamızın üzvləri də medallar uğrunda əzmlə güləşdilər. Bürünc mükafatçı əldə edən Əmrah Əmrahov (48 kq) da inamlı təsir bağışladı. O, verdiyimiz tapşırığı düzgün yerinə yetirdi və medalsız qalmadı. Digər idmançımız Yusif Əhmədli (71 kq) hakimlərin səhvi və savadsızlığı ucbatından finala çıxa bilmədi. Orxan Hacıyev (80 kq) də referilərin bilərəkdən və ya bilməyərəkdən etdiyi haqsızlıq səbəbindən yarımfinalda uduzdu".
İsrafilov bildirib ki, daha bir və ya iki güləşçi finala yüksəlsəydi millimiz komanda hesabında dünya çempionu ola bilərdi: "Emil Abdullayevə (65 kq) zədəsi mane oldu. Lakin hər şeyə rəğmən yenə də yaxşı mübarizə apardı".
Qeyd edək ki, Azərbaycan millisi 2 qızıl və 1 bürünc medalla dünya çempionatında komanda hesabında 3-cü olub.
Banuçiçək Hüseynli
İdman.biz
