Idman.biz
Albaniyanın paytaxtı Tiranada keçirilən Avropa çempionatında Azərbaycanın yunan-Roma güləşçisi Qurban Qurbanov parlaq qələbə qazanaraq qızıl medala sahib olub. 82 kq çəki dərəcəsində mübarizə aparan təmsilçimiz həlledici qarşılaşmada Adlet Tyulbayevə (UWW) qalib gələrək fəxri kürsünün ən yüksək pilləsinə yüksəlib.
İdman.Biz xəbər verir ki, bu uğurla Azərbaycan millisi yarışın növbəti gününü iki qızıl və bir bürünc medalla tamamlayıb. Digər qızıl medalı isə 67 kq çəki dərəcəsində rəqiblərinə şans tanımayan Həsrət Cəfərov qazanıb. O, finalda türkiyəli rəqibi Murad Fıratı məğlub edərək karyerasında dördüncü dəfə qitə çempionu adını qazanıb.
Xatırladaq ki, aprelin 26-dək davam edəcək Avropa çempionatında yunan-Roma güləşçilərimiz ümumilikdə uğurlu çıxış edirlər. Daha əvvəl Rəşad Məmmədov (55 kq), Nihat Məmmədli (60 kq) və İslam Abbasov (87 kq) bürünc medal qazanaraq komandanın hesabına aktiv xallar yazdırıblar. Hazırda Azərbaycan güləşçiləri komanda hesabında liderlər sırasındadır.
21:06
67 kq çəki dərəcəsində mübarizə aparan Azərbaycanın yunan-Roma güləşçisi Həsrət Cəfərov Albaniyanın paytaxtı Tiranada keçirilən Avropa çempionatında qızıl medal qazanıb. Təmsilçimiz birinci yer uğrunda qarşılaşmada türkiyəli Murat Fırata (7:5) qalib gələrək fəxri kürsünün ən yüksək pilləsinə yüksəlib.
Görüş gərgin və bərabər mübarizə şəraitində keçsə də, Azərbaycan idmançısı xarakter nümayiş etdirməyi və final fitinə qədər üstünlüyü qoruyub saxlamağı bacardı.
Bu, Cəfərovun Avropa Güləş Çempionatında qazandığı dördüncü qızıl medalıdır.
20:20
Azərbaycanın yunan-Roma güləşçisi Nihat Məmmədli Albaniyanın paytaxtı Tiranada keçirilən Avropa çempionatında bürünc medal qazanıb.
60 kq çəki dərəcəsində mübarizə aparan təmsilçimiz üçüncü yer uğrunda qarşılaşmada Suner Konunova (UWW) qalib gələrək (6:0) fəxri kürsüyə yüksəlib.
09:59
Bu gün Albaniyanın paytaxtı Tiranda keçirilən Avropa çempionatında Azərbaycanın iki yunan-Roma güləşçisi qızıl, biri isə bürünc medal uğrunda mübarizə aparacaq.
İdman.Biz xəbər verir ki, yarışın üçüncü günündə Həsrət Cəfərov (67 kq) finalda Türkiyə təmsilçisi Murat Fıratla, Qurban Qurbanov (82 kq) isə eyni raundda UWW təmsilçisi Adlet Tyulyubaevlə qarşılaşacaq. Nihat Məmmədli (60 kq) isə bürünc medal uğrunda UWW təmsilçisi Suner Konunovla üz-üzə gələcək.
Qeyd edək ki, Avropa çempionatı aprelin 26-da başa çatacaq. Daha əvvəl yunan-Roma güləşçilərindən Rəşad Məmmədov (55 kq) və İslam Abbasov (87 kq) bürünc medal qazanıb.
