İdman.biz
"Azərbaycan bayrağını dünya çempionatında dalğalandırmağı sözlə ifadə etmək çətindir. Çox qürurverici hissdir. Onu yaşayan bilər".
İdman.biz xəbər verir ki, bunu Azərbaycanın yunan-Roma güləşçisi Nihat Məmmədli (63 kq) deyib.
Albaniyanın paytaxtı Tiranada keçirilən qeyri-olimpiya növləri üzrə dünya çempionatında qalib olan idmançımız Hava Limanında qarşılama zamanı jurnalistlərin suallarını cavablandırıb. O bildirib ki, yarışdan əvəl qələbəyə inanması həlledici olub: "İşin yarısı inanmaqdır. Çempion olacağıma inanırdım. Amma ilk dəfə idi beynəlxalq arenada 63 kq-da çıxış edirdim. Bu da dünya çempionatına təsadüf etdiyi üçün mənim üçün ağır olacağı məlum məsələ idi. Çətin görüşlərimin olacağını bilirdim. Amma özümü buna hazır etmişdim. Çətin olsa da zəhmətimiz yerdə qalmadı".
Nihat gələn il yenidən Olimpiya çəkisinə qayıdacağını bildirib: "Avropa çempionatında olimpiya çəkisi olan 60 kq-da qalib gəldim. Builki hədəfim Olimpiya Oyunlarında iştirak idi. Amma qismət olmadı. Əvəzində dünya çempionu oldum. Mənim öz çəkim 60 kq-dır. Gələn il öz çəkimə qayıdacam".
Qeyd edək ki, Nihat Məmmədli finalda qazaxıstanlı Yerjet Jarlikassinə 6:1 hesabı ilə qalib gələrək, fəxri kürsünün ən yüksək pilləsində qalxıb.
Emin Ağa
İdman.biz
