Idman.biz
Karyerasını başa vuran Azərbaycanın güləş hakimi Natiq Hacıyevin "Report"a müsahibəsi
- Güləşə gəlişiniz necə olub?
- Özüm güləşlə məşğul olmuşam. 1995-ci ildə isə artıq yarışlara idmançı hazırlaşdırırdım. Həmin vaxtlarda hakimləri görürdüm və onların işi çox xoşuma gəlirdi. Qərara gəldim ki, mən də ədalət qoruyucusu olum. Federasiya şərait yaratdıqdan sonra bu işə başladım. Azərbaycan Güləş Federasiyasının Hakimlər Kollegiyasının sədri Qərib Əliyev bu işdə mənə çox kömək etdi. Həmin vaxtlar rayondan gəlmişdim, təcrübəm az idi. Amma o, mənə çox dayaq oldu.
- Güləşdən birdəfəlik getmək istəyirsiniz?
- Yox, hakimlikdən gedirəm. Amma doğma rayonum Göyçayda yeni-yeni uşaqlar yetişdirmək istəyirəm. Əvvəllər də bu işlə məşğul olmuşam. Yaxud ola bilsin, orada çalışan müəllimlərə mənəvi dəstəyimi göstərdim. Yəni güləşdə qalacağam.
- Arxada qalan illərdə hakimlik fəaliyyətinizi necə qiymətləndirərdiniz?
- Mən hakimlik edərkən çox çətinliklərlə üzləşmişəm. Azərbaycan Güləş Federasiyasının bir neçə dövr əvvəlki rəhbərliyi imkan yaratmırdı ki, imtahan verim, beynəlxalq yarışlara təyinat alım. Onlara dəfələrlə rus, ingilis dillərində bildiyimi söyləsəm də, sözlərimi ciddiyə almırdılar. Düşünürdülər ki, rayonda yaşamışam, onları aldadıram. Lakin sonradan vəziyyət dəyişdi. Bakıdan Dünya Güləş Birliyinə məktub göndərildi ki, bizdə yaşı çox olan hakim var və onu imtahanlara qəbul etməyinizi xahiş edirik. Qarşı tərəfdən müsbət rəy gəldi və ilk imtahandan uğurla keçdim. Müvafiq olaraq II və I kateqoriyalar üzrə imtahanları da uğurla adladım. Təəssüf ki, olimpiya kateqoriyası imtahanından keçə bilmədim.
- Azərbaycanlı güləş hakimlərinin səviyyəsi sizi qane edir?
- Bizim çox yaxşı hakimlərimiz var. Xüsusilə də fərqləndirə biləcəyimiz gənclər çoxdur. Əksəriyyəti də olimpiya kateqoriyasına malikdirlər. Onların hər biri öz üzərində işləyir. Deməyim odur ki, Azərbaycan güləş hakimliyinin gələcəyini çox yaxşı görürəm. Hətta bizim III kateqoriyalı hakimlərimiz Avropanın bəzi II dərəcəli referilərindən yaxşı idarəçilik edirlər. Bizim hakimlər qarşılaşma idarə edəndə dərhal hiss olunur və xüsusi rəğbət bəslənilir.
- Sizin üçün Azərbaycanın gəlmiş-keçmiş ən yaxşı üç güləşçisi kimdir?
- Fərid Mansurov, Hacı Əliyev və bir az da keçmişə nəzər salsaq, Məhyəddin Allahverdiyevin adını çəkə bilərəm.
- Olimpiya çempionlarımız Toğrul Əsgərov və Şərif Şərifovun adını çəkmədiniz...
- Məncə, Toğrul Allahın verdiyi istedad sayəsində olimpiya çempionu oldu. Sanki digərləri məşqlərdə əziyyət çəkərək güləşib çempionluqlar qazanıblar, Toğrul isə gözünü açandan xüsusi istedada malik olub. Təbii ki, Toğrul Əsgərov da mənim üçün çox dəyərli güləşçidir.
- 30 illik hakimlik karyeranızda unuda bilmədiyiniz qarşılaşmalar olub?
- Çox belə görüşlər idarə etmişəm. Bosniya və Herseqovinada dünya çempionatının final qarşılaşmasına təyinat almışam. Çox ağır görüş keçmişdi. Məsuliyyətli qarşılaşma idi. Və onu da bildirim ki, karyeramın son yarışı olan Yunanıstanın paytaxtı Afinada keçirilən U-17 dünya çempionatında da final qarşılaşmasını idarə etdim. Özbəkistan və Yaponiya təmsilçiləri üz-üzə gəlirdi. Çox uğurlu idarəçilik alındığını düşünürəm.
- Hakimlik karyeranızda sonradan peşman olduğunuz qərarlar vermisiniz?
- Hansı hakim desə ki, mən karyeramda səhvə yol verməmişəm, yalan danışar. Hər bir referinin işində səhv olur. Məndə də bir neçə dəfə belə anlar yaşanıb. Hansısa qərar qəbul etmişəm, idmançılardan biri qalib olub. Video vasitəsilə təkrara baxıb verdiyim qərardan utanmışam. Hər kəs insandır və səhv edə bilər.
- Azərbaycan çempionatını, yoxsa beynəlxalq yarışları idarə etmək çətindir?
- Daxili yarışlarda idarəçilik etmək daha çətindir. Çünki mənə görə Azərbaycan çempionatının final görüşünü idarə etmək dünya çempionatının həlledici qarşılaşmasında ədaləti qorumaqdan çətindir. Azərbaycan güləşinin səviyyəsini dünya arenasından da yüksəkdə hesab edirəm. İdmançılarımız dünya və Avropa arenalarına çıxanda çox hörmət edilir. Şəxsən özüm görmüşəm, idmançılarımızdan çəkinirlər, onları çox ciddiyə alırlar və belə də olmalıdır. Azərbaycan güləşçisinin rəqibi olimpiya çempionu olsa da, onun məşqçisinin gözündə daim narahatlıq hiss edilir. Hamı bilir ki, Azərbaycanda zəif güləşçi olmur.
İdman.biz
