Idman.biz
O, həm müəllim, həm idman ustası, həm də gənclərin sağlam inkişafı uğrunda çalışan bir təlimçidir. Səbail rayonu M. Rəhim adına 7 saylı tam orta məktəbin fiziki tərbiyə müəllimi və Azərbaycan Qılıncoynatma Federasiyasının məşqçisi Mehriban Cəfərova bu gün həm də OVEP təlimçisi kimi gənclərlə birgə fəaliyyət göstərir. Onun fikrincə, OVEP yalnız idman deyil, həm də əməkdaşlıq, dürüstlük və sağlam rəqabət dərsidir.
İdman.Biz Mehriban Cəfərova ilə idmanda motivasiyanın əhəmiyyəti, qardaşı ilə olan ortaq peşə maraqları və gənclərlə işləməyin incəlikləri barədə söhbətləşib.
– Qılıncoynatma ilə məşğul olmaq sizə ən çox nə hiss etdirir və sizi motivasiya edən nədir?
– Qılıncoynatma mənim üçün əvəzolunmaz bir idman növüdür. Əvvəllər hobbi kimi başladım, amma zaman keçdikcə bu idman mənim üçün bir həyat tərzinə çevrildi.
– Qardaşınız Etibar Cəfərov da qılıncoynatma ilə məşğuldur. İdmana olan bu ortaq sevgi sizi daha çox rəqib, yoxsa komanda yoldaşı edir?
– Mən idmana beşinci sinifdə oxuyarkən başlamışam. Bu idman növü mənim üçün çox maraqlı idi. Qardaşım məndən kiçik olsa da, onu da həvəsləndirdim. İkimiz də sovet dövründə yığma komandanın üzvü olmuşuq və idman ustası dərəcəsinə sahibik. Hazırda hər ikimiz məşqçiyik - mən həm müəllimə, həm də məşqçiyəm. Maraqlarımız ortaqdır, bu da bizi daha da yaxınlaşdırır. Qardaşım çox gözəl bir psixoloq və yaradıcı insandır. Onunla fəxr edirəm.
– Sizi tez–tez OVEP təlimləri ilə bağlı layihələrdə görürük. Bu təlimlər gənclərə nə qazandırır və onların inkişafına necə töhfə verir?
– OVEP - Olimpiya Dəyərlərinin Tədrisi Proqramıdır. Məqsəd - məktəblərdə Olimpiya təhsilini və dəyərlərini təbliğ etməkdir. Bu proqram gənclərə "hörmət", "dostluq" və "mükəmməllik" kimi olimpiya prinsiplərini aşılamağa xidmət edir. Əyləncəli və interaktiv idman oyunları vasitəsilə uşaqlar bu dəyərləri öyrənir və gündəlik həyatlarına tətbiq edirlər.
– Azyaşlı uşaqlarla işləmək çətin olsa da, çox maraqlıdır. Onlara dərs keçərkən ən çox nəyə diqqət yetirirsiniz və bu yaş qrupunu idmana necə həvəsləndirirsiniz?
– Bəli, azyaşlı uşaqlarla işləmək həm çətin, həm də çox maraqlıdır. Uşaqlar oyun və diqqət mərkəzində olmağı sevirlər. Ona görə də mən dərslərimdə maraqlı və hərəkətli oyunlardan istifadə edirəm. Bu, onların idmana olan marağını artırır. Qılıncoynatma həm intellektual, həm də çeviklik tələb edən bir idman növüdür. Mən uşaqlara daima deyirəm: bədən güclü olduqca ruh da güclənir. Sağlam bədən - sağlam ruhun açarıdır.
Yusif Sadıqlı
FOTO: İslam Atakişiyev
