Mariya Stadnik: "Avropa çempionatında bürünc medal qazanmağı uğur saymaq olar."

"İndiki vəziyyətdə bürünc medalı uğur hesab etmək olar".

İdman.biz xəbər verir ki, bunu "Report"a açıqlamasında Azərbaycanın qadın güləşi üzrə millisinin koordinatoru Mariya Stadnik deyib.

Olimpiya mükafatçısı qadınlardan ibarət yığmanın Slovakiyanın paytaxtı Bratislavada keçirilən Avropa çempionatındakı çıxışı barədə danışıb:

"Biz hər dəfə qitəmiqyaslı turnirlərdə qızıl medallar qazandığımız üçün hədəflərimiz böyük olub. Lakin hazırkı millinin heyətinin əksəriyyəti gənc qızlardan təşkil olunub. Sevindirici haldır ki, komanda turniri mükafatsız başa vurmadı. İndiki vəziyyətdə bürünc medalı uğur hesab etmək olar. Zədə səbəbindən yarımfinalda məğlub olan Jalə Əliyeva finala çıxmalı idi. O, həlledici mərhələyə adlasaydı, qızıl medal qazanacağına əmin idim. Çünki Jalənin buna potensiyalı çatır. Digər güləşçilər isə gənc və təcrübəsizdirlər. Zamanla onların da özlərini doğruldacağına inanıram".

36 yaşlı mütəxəssis iki gün sonra start götürəcək qadınlar arasında Azərbaycan çempionatında 70-ə yaxın güləşçinin mübarizə aparacağını söyləyib:

"Sevindirici haldır ki, Azərbaycanda güləşlə məşğul olmaq istəyən xanımların sayı artmaqdadır. Unutmayaq ki, daxili çempionatda rəqabət olarsa, beynəlxalq yarışlarda uğur qazanmaq mümkündür. Biz təkcə Mariya Stadnikin qazandığı uğurlara yox, gələcəkdə digər qadın güləşçilərin də nəticələrinə sevinəcəyik. Mən onlara inandığım kimi, onlar da özlərinə güvənməlidirlər".

Qeyd edək ki, qadınlardan ibarət milli Avropa çempionatını 1 bürünc medalla başa vurub.

İdman.biz