Idman.biz
"Rəqib təcrübəli komandadır, bir neçə ildir Avropa kuboklarında iştirak edir. Həmçinin Balkan ölkələrinə yaxınlığı səbəbindən Balkan həndbol məktəbinin təsiri də öz sözünü deyir".
Bu sözləri qadın həndbolçulardan ibarət "Kür" klubunun baş məşqçisi Fuad Yanqildin Avropa Kubokunun üçüncü turunda Şimali Makedoniyanın "Çair" komandası ilə keçirəcəkləri oyun barədə danışarkən deyib.
Baş məşqçi bildirib ki, hazırlıq prosesi rəqibin təhlilindən sonra müəyyənləşdiriləcək.
"Rəqibi təhlil edirik, çünki indiyədək bu komanda ilə qarşılaşmamışıq. Təhlillərdən sonra nəticə çıxaracaq, buna uyğun olaraq texniki və taktiki hazırlığa başlayacağıq", - deyə o AZƏRTAC-a açıqlamasında söyləyib.
O, qarşıdakı oyunlarda müdafiəyə xüsusi diqqət yetirəcəklərini vurğulayıb:
"Hər şey müdafiədən başlayır. Onun üzərində daha çox işləyəcəyik, müdafiədən əks-hücuma çıxmağa çalışacağıq. Son oyundan sonra qızların əhval-ruhiyyəsi yaxşıdır, yəni hər şey qaydasındadır".
Növbəti mərhələ barədə də danışan Fuad Yanqildin əlavə edib:
"Mərhələni adlamağa çalışacağıq, bunun üçün ciddi hazırlıq görəcəyik. İdmandır, hər şey mümkündür. Top dairəvi, meydan isə düzdür. İnşallah, daha güclü olan qalib gələcək".
Qeyd edək ki, komandalar arasında ilk oyun noyabrın 13-də, cavab qarşılaşması 15-də baş tutacaq. Hər iki görüş saat 15:00-da başlayacaq.
