Güləşçimiz Zaqrebdə finala çıxıb

Xorvatiyanın paytaxtı Zaqrebdə güləşçiləin reytinq turniri davam edir. Sport24.az xəbər verir ki, yarışda Azərbaycan idmançıları da çıxış edirlər.

Azərbaycan Güləş Federasiyasının mətbuat xidməti güləşçilərimizin nəticələrini təqdim edib.

Yunan-Roma güləşi

55 kq

Elmir Əliyev A qrupunda iranlı Mehdi Əhədiyə (6:3), özbəkistanlı Jasurbek Ortikboyevə (10:5) və sinqapurlu Aleksandr Kuevasa (8:0) qalib gəlib. O, yarımfinalda amerikalı Bredi Kuntsudan güclü olub - 5:0. Elmir finalda Əhədiylə güləşəcək.

60 kq

Eldəniz Əzizli startda özbəkistanlı Mehrac Bəhramova uduzub - 0:9.

Nihat Məmmədli israilli Melkamu Feteneyə tam üstünlüklə (11:1) qalib gəlsə də, 1/4 finalda Bəhramova 6:11 hesabı ilə məğlub olub.

Hüseyn Qəribov debütdə serbiyalı Georgi Tibilova uduzub - 0:6. O, təsəlliverici görüşdə israilli Abere Fetenendən güclü olub - 4:1. Hüseyn üçüncülük üçün iranlı Puya Naserpurla güləşəcək.

72 kq

Ülvü Qənizadə ilk mərhələdə çexiyalı Denis Mertli üstələsə (4:3) də, zədəyə görə yarışdan çəkilib.

Ruslan Nurullayev debütdə macarıstanlı Levente Levaya 1:4 hesabı ilə məğlub olub. O, təsəlliverici görüşdə finlandiyalı Matias Lipastiyə şans verməyib - 11:0. Ruslan üçüncülük üçün iranlı Mohammadreza Gerayi ilə güləşəcək.

82 kq

Qurban Qurbanov serbiyalı Uroş Leçiç (8:0) və belaruslu İlya Bitseyev (6:0) üzərində inamlı qələbə qazanıb. O, yarımfinalda iranlı Qolamreza Faroxinsenjaniyə uduzub - 3:11. Qurban üçüncülük üçün rumıniyalı Vasile Koyokla güləşəcək.

97 kq

Arif Niftullayev niderlandlı Tirone Sterkenburqa 3:2 hesabı ilə qalib gəlsə də, 1/8 finalda iranlı Şayan Habibzareyə uduzub - 0:8.

Murad Əhmədiyev rusiyalı Maqomed Murtazaliyevi minimal fərqlə (2:1) yarışdan kənarlaşdırsa da, belaruslu Abubakr Xaslaxanova uduzub - 2:12. O, təsəlliverici görüşdə iranlı Hamidreza Badkanı məyus edib - 5:4. Murad üçüncülük uğrunda Habibzareylə güləşəcək.

130 kq

Beka Kandelaki Macarıstan güləşçilərinə - Dariuş Viteklə (9:0) Laslo Darabosa (8:2) qalib gəlib. O, yarımfinalda finlandiyalı Konsta Maeenpaeyə məğlub olub - 3:4. Beka bürünc medal üçün rusiyalı Marat Kamparovla güləşəcək.

Sərxan Məmmədov çexiyalı Artur Sarkisyanla amerikalı Kourtney Frimanı 3:1 hesabı ilə məğlub edib. O, yarımfinalda iranlı Əliəkbər Yusifəhmədxaliyə uduzub - 1:9. Sərxan üçüncülük uğrunda macarıstanlı Koppani Laslo ilə güləşəcək.