Idman.biz
Sərbəst güləş üzrə U17 milli komandanın böyük məşqçisi Əsgərxan Novruzovun Azərbaycan Güləş Federasiyasının mətbuat xidmətinə müsahibə verib.
İdman.biz xəbər verir ki, o, Avropa çempionatına hazırlıq mərhələsindən danışıb.
- Astarada keçirilən ölkə birinciliyinin nəticələrini necə qiymətləndirirsiniz?
- Yeniyetmələrdə istər-istəməz hər il komanda yenilənir. 2007-ci il təvəllüdlü uşaqlar artıq gənclərə keçdilər. Onların arasında Avropa və dünya mükafatçıları, çempionları var idi. Ötən ildən U17-də qalan heyət üzvlərinin 90 faizi öz sözlərini Astarada da dedilər. Çox yox, cüzi yenilik oldu. Əslində yeniliyin olması yaxşı əlamətdir. Məsələn, Avropa, və dünya mükafatçısı Hüseyn İsmayılov 65 kq-da medalsız qaldı. Bu, o deməkdir ki, həmin çəkidə daha güclü rəqabət olub. Rəqabətin olmağı inkişaf deməkdir. Deməli, güləşimiz ilbəil inkişaf edir.
- "Zəfər kuboku"nda iştirak etmədiniz. Avropa çempionatına qədər hər hansı yarışa qatılmamağınız problem yaratmayacaq ki?
- Düzdür, Avropa çempionatına qədər yarış olanda daha yaxşı olur. Amma ötən il də Avropa çempionatına yarışsız getmişdik. Daha dəqiq desək, Türkiyədəki yarışda çıxış etdikdən sonra ölkə birinciliyi keçirilmişdi. Ölkə birinciliyindən sonra isə Avropa çempionatına qədər heç bir yarışa qatılmamışdıq. Buna baxmayaraq, Avropa çempionatından yaxşı nəticələrlə qayıtdıq. Komanda da Avropa çempionu oldu. İnşallah, inanıram ki, bu il də yarışın olmamağı bizə problem yaratmayacaq. Əsas məşqlərdir, hazırlıq prosesidir.
- Həmişəki kimi, məsul yarışa hazırlığı Xaçmazda keçirsiniz?
- Burada yüksək səviyyədə şərait yaradıblar. Artıq ikinci təlim-məşq toplanışını başa vurduq. Əvvəl ümumi-xüsusi fiziki hazırlığa, daha sonra isə taktika və texnikanın təkmilləşdirilməsinə diqqət ayırdıq. Son toplanışımızı da Xaçmaz Olimpiya İdman Kompleksində keçirməyi planlaşdırırıq. İnanıram ki, yenidən qızıl, gümüş, bürünc medalları qazanaraq, komanda hesabında Avropa çempionu olacağıq.
İdman.biz
