Idman.biz
Bu günlərdə Bakı İdman Sarayında keçirilən güləş üzrə Azərbaycan çempionatında bu idman növü üçün olduqca nadir hadisə baş verib. Yunan-roma güləşi üzrə 97 kq çəki dərəcəsində keçirilən yarışların finalında iki doğma qardaş - Məhəmməd və Murad Əhmədiyevlər üz-üzə gəliblər.
Döyüş idman növlərinin idman praktikasında qardaş idmançıların, hətta əkiz olsalar belə, müxtəlif çəki dərəcələrinə ayrılması qəbul olunmuş yanaşmadır. Məqsəd, əlbəttə ki, aydındır - hər iki idmançının tam gücü ilə mübarizə aparmasını təmin etmək. Lakin ölkə çempionatında məhz belə qeyri-adi hadisə yaşanıb.
Bəs hər iki qardaşı yetişdirən məşqçinin simpatiyası kimin tərəfində olur? Onları tam gücləri ilə mübarizəyə necə sövq etmək olar?
Bu suallarla İdman.Biz final qarşılaşmasından əvvəl Əhmədiyev qardaşlarının şəxsi məşqçisi Səməd Çopsiyevə müraciət edib.
"Güləş xalçasından kənarda onlar qardaşdırlar. Xalça üzərində isə rəqibdirlər və kimin daha güclü olduğunu müəyyənləşdirməlidirlər. İlk növbədə onlara bunu izah etməyə çalışdım. Bir-birinə güzəşt məsələsinin qətiyyən gündəmdə ola bilməyəcəyini dərhal xəbərdarlıq etdim. Qalib, bu qələbəyə daha çox ehtiyacı olan yox, daha güclü olan olmalıdır.
Şəxsi simpatiyaya gəlincə isə, səmimi desəm, beş yaşından məşq etdirdiyim qardaşlar arasında seçim etmək mənim üçün çox çətindir. Təkcə mənim üçün yox, onların doğulub boya-başa çatdığı Balakən rayonu üçün də bu seçimi etmək asan deyil. Burada onları fərqləndirmirlər və sadəcə "Əhmədiyev qardaşları" deyə çağırırlar", - deyə Səməd Çopsiyev qeyd edib.
Qeyd edək ki, final qarşılaşması gərgin və prinsipial mübarizə şəraitində keçib. Nəticədə böyük qardaş Məhəmməd daha titullu kiçik qardaş – Murada məğlub olub. Beləliklə, Murad Əhmədiyev 97 kiloqram çəki dərəcəsində güləş üzrə Azərbaycan çempionu olub.
