Dünya çempionatı: Abdullayev finalda, 2 sərbəst güləşçimiz yarımfinalda

Albaniyanın paytaxtı Tiranada güləş üzrə U-23 dünya çempionatı davam edir.

İdman.biz xəbər verir ki, yarışın beşinci günündə sərbəst güləşçilər mübarizəyə başlayıblar.

Azərbaycan millisi 5 çəkinin hər birində təmsil olunub.

U-23 dünya çempionatı
Sərbəst güləş
61 kq
Ruslan Abdullayev albaniyalı Endroi Avdyliyə (11:0), kanadalı Fotis Papadopoulosa (tuş) və ukraynalı Mikita Abramova (3:1) qalib gələrək yarımfinala yüksəlib. Ruslan yarımfinalda hindistanlı Abişek Dakayla güləşib və 11:1 hesabı ilə qalib gəlib.

74 kq
Cəbrayıl Qadjiyev almaniyalı Satas Volfa 9:3 hesabıyla qalib gəlsə də, 1/8 finalda qırğızıstanlı Orozobek Toktomambetova 1:4 hesabıyla məğlub olub.

86 kq
Arseniy Djioyev almaniyalı Coşua Morodionyə (11:0), qvatemalalı Kaser Estradaya (11:0) və hindistanlı Dipak Dipaka (8:0) qalib gələrək yarımfinala yüksəlib. Arseniy yarımfinalda yaponiyalı Yuday Takahaşiylə güləşəcək.

92 kq
Abdulcəlil Şabanov 1/8 finalda yunanıstanlı Qkivi Bliatzeyə 9:11 hesabıyla məğlub olub.

125 kq
Aydın Əhmədov çinli Jinhai Vanqa (11:0), polşalı Mişel Dubovskiyə (5:4) və yaponiyalı Toyoki Hamadaya (4:2) qalib gələrək yarımfinala yüksəlib. Aydın yarımfinalda bolqarıstanlı Alen Xubulovla güləşəcək.

Qeyd edək ki, mundialda yunan-Roma güləşçilərimizdən Rəşad Məmmədov (55 kq) gümüş, Nihat Quluzadə (60 kq) ilə Xasay Həsənli (77 kq) bürünc medal qazanıb.

İdman.biz