İdman.biz
"Hər bir idmançı kimi əsas hədəfim qızıl medal olsa da, gümüş nəsib oldu. Səhvlərim üzərində işləyib gələn yarışlarda birinciliklər əldə etməyə çalışacağam".
Bunu İdman.bizə Azərbaycanın U-20 millisinin güləşçisi Cocu Səmədov deyib.
İspaniyada keçirilən U-20 dünya çempionatının final görüşündə Cocu qırğızıstanlı Asan Janişova uduzaraq gümüş medal əldə edib. O, qızıl medalı əldə edə bilməməsinin səbəbini də açıqlayıb: "Dünya çempionatında hər bir ölkə 1 nömrə güləşçiləri ilə təmsil olunurdu. 1/8 finalda Serbiyadan olan Avropa çempionatının mükafatçısından, 1/4 də isə erməni güləşçisindən üstün oldum. Yarımfinalda haqsızlıqlarla qarşılaşsam da, həlledici görüşə vəsiqə qazanmağı bacardım. Finala kimi görüşlərim məşqçilərimin və mənim planlaşdırdığım kimi keçdi. Finalda da eyni tərzdə güləşmək istədim. Sadəcə, dözümlülük cəhətdən rəqib məndən üstün oldu. Məqsədim qızıl idi, amma gümüşü uğur saymamaq naşükürlük olar".
Qeyd edək ki, Cocu Səmədovun qazandığı gümüş U-20 dünya çempionatında əldə etdiyimiz yeganə medaldır.
Emin Ağa
İdman.biz
