Idman.biz
"Hacı Əliyevlə eyni komandada oynayanda öz futbolçularımızı da çaş-baş salır".
İdman.biz xəbər verir ki, bunu sərbəst güləş üzrə Olimpiya və dünya çempionatı mükafatçısı Cəbrayıl Həsənov jurnalist Azər İsmayılın "YouTube" layihəsində deyib.
Millinin sabiq kapitanı bildirib ki, güləşçilərin futbol matçları çox maraqlı keçir. Həsənovun sözlərinə görə, futbolda Hacı Əliyev həmişə cığallıq edir.
Həmkarının dediklərini təsdiqləyən yunan-Roma güləşi üzrə Azərbaycan millisinin məşqçisi Həsən Əliyev cığallığın idmançı xarakterindən irəli gəldiyini vurğulayıb: "Bütün idmançılarda cığallıq var. Bu, daha çox uduzmağı qəbul etməməklə bağlıdır. Ümumiyyətlə, məğlubiyyətlə asanlıqla barışan şəxs böyük güləşçi ola bilməz. Məqsədə çatmaq üçün inadkarlıq göstərmək vacibdir. Mütləq zəhmət çəkməli, bütün gücünü ortaya qoymalısan. Xüsusən də, söhbət güləşdən gedirsə. Bir dəfə futbolçularla yarışqabağı eyni mərkəzdə qalası olduq. Adını çəkmək istəmirəm, orada olan məşhur futbolçularımızdan biri ilə maraqlı söhbətimiz oldu. Öz aramızda müzakirə edirdik ki, futbol çətindir, yoxsa güləş. Elə həmin vaxt gördüm ki, futbolçuların cəm halında çıxdığını gördüm. Onların hara getdiyini soruşanda həmsöhbətim cavab verdi ki, gəzməyə gedirlər. Dedim bax, güləşlə futbolun əsas fərqi budur. Biz məşqdən çıxmışıq, aşağı düşüb su almağa halımız yoxdur, ancaq siz məşqdən çıxıb gəzməyə gedirsiniz".
Həsənov da güləşin çətin idman növü olduğunu qeyd edib: "Güləş elə idman növüdür ki, cəmi bir səhvlə karyeranı bitirə bilərsən. Komanda oyunlarında isə belədir ki, səhv edəndə komanda yoldaşın haradasa sənin yanlışını düzəldə bilər. Güləşçi daim öz üzərində çalışmalıdır. O vaxt Toğrul Əsgərovla bir otaqda qalırdım. Məşqdən çıxandan sonra otağa gəlib bir saat uzanırdıq. Toğrul deyirdi ki, birinci sən çimməyə gir, sonra yeməyə gedək. Mən deyirdim yox, birinci sən gir. O qədər yorğun olurduq ki, qolumuzu qaldırıb çimə də bilmirdik".
İdman.biz
