İdman.biz
Azərbaycan Paris-2024 Yay Olimpiya Oyunlarında güləşin bütün növlərində təmsil olunacaq.
İdman.biz xəbər verir ki, həm sərbəst, həm yunan-Roma, həm də qadın güləşi millimiz Fransa paytaxtına lisenziya qazanıb.
Bu isə o deməkdir ki, hər üç növdə yarışlar bizsiz keçirilməyəcək. Artıq beş Olimpiadadır ki, Azərbaycan güləşin hər üç növündə "bizsiz olmaz" mesajı verir.
Bu ənənənin əsası Pekin-2008-də qoyulub. Müstəqillik illərinin ilk üç Olimpiadasında sərbəst və yunan-Roma güləşində təmsil olunan Azərbaycan Çinin paytaxtından başlayaraq qadın pəhləvanlarla da multidman tədbirinə qatılır.
Bu era Mariya Stadniklə başladığı kimi onunla da davam edir. O, beş Olimpiadada sərbəst və yunan-Roma güləşçilərimizə təkcə yol yoldaşı deyil, həm də uğur gətirən idmançı olub.
Əvvəlki dörd Oyunlardan fərqli, Mariya bu dəfə qadın millimizin yeganə, tək üzvü olacaq. O, qadın millimizi yarışdan kənar qalmasına son şansında - İstanbulda keçirilən Dünya Təsnifat Turnirində əngəl olub.
Beləliklə, güləşçilərimiz Paris-2024-ə üç komandayla yollanacaq. Sərbəst güləşçilərimiz tam tərkibdə 6 pəhləvanla olacaq. "Klassiklər"imiz 5 çəkidə mübarizə aparacaq. Stadnik isə qadın millimizi 5-ci medal üçün tək daşıyacaq.
Yığmamız Olimpiadadakı 18 medal dəstindən 12-nə iddia edəcək. Bu, mümkün lisenziyaların 2/3-nin, təxminən 67 faizinin əldə olunması deməkdir. Pekin-2008, London-2012 və Rio-2016-da daha çox güləşçimiz olub.
| Olimpiada | Sərbəst | Yunan-Roma | Qadın | Cəmi |
| Atlanta-1996 | 6 | 2 | - | 8 |
| Sidney-2000 | 6 | 3 | - | 9 |
| Afina-2004 | 5 | 3 | - | 8 |
| Pekin-2008 | 7 | 6 | 3 | 16 |
| London-2012 | 6 | 5 | 2 | 13 |
| Rio-2016 | 6 | 5 | 3 | 14 |
| Tokio-2020 | 3 | 2 | 2 | 7 |
| Paris-2024 | 6 | 5 | 1 | 12 |
Parisdə sərbəst güləş millimizi Əliabbas Rzazadə (57 kq), Hacı Əliyev (65 kq), Turan Bayramov (74 kq), Osman Nurmaqomedov (86 kq),
Maqomedxan Maqomedov (97 kq) və Giorgi Meşvildişvili (125 kq) təmsil edəcəklər. Yunan-Roma yığmamızda Murad Məmmədov (60 kq), Həsrət Cəfərov (67 kq), Sənan Süleymanov (77 kq), Rafiq Hüseynov (87 kq) və Sabah Şəriəti (130 kq) yer alıblar. Qadın güləşində isə komandanın lideri və dördqat Olimpiya mükafatçısı
Mariya Stadnik (50 kq) xalçaya çıxacaq.
Qeyd edək ki, Atlantada 20, Sidneydə 16, sonrakı Olimpiadaların hamısında 18 dəst medal sahibini tapıb.
Vüqar Xeyrullayev
İdman.biz
