Idman.biz
Qırğızıstanın paytaxtı Bişkekdə keçirilən belbağlı kuraş üzrə dünya çempionatının qalibi olan Gözəl Zutova özündən 50 kiloqram ağır rəqibini məğlub edib.
O, gərgin keçən yarışda güclü rəqiblərinə qalib gəldiyini diqqətə çatdırıb.
"Yarış çox maraqlı keçdi, çünki kimin qalib gələcəyini əvvəlcədən təxmin etmək olmurdu. Dünya çempionu olan amerikalı pəhləvan və indiyədək heç kimə uduzmayan Tacikistan təmsilçisi belə məğlub oldu. Çempionatda 61 ölkənin idmançıları mübarizə aparırdılar. Həm klassik, həm də sərbəst növ üzrə ümumilikdə 6 qarşılaşmaya çıxdım və hamısında qələbə qazandım", - deyə o report.az-a açıqlamasında söyləyib.
G.Zutova həlledici görüşlərdəki rəqibləri və çəki fərqi barədə də danışıb:
"Sərbəst növdə yarışanda çəkim 77 kiloqram idi. Rəqiblərim isə daha ağır idilər. Ən çətin rəqibim Özbəkistan təmsilçisi oldu, çünki o, məndən 50 kiloqram ağır idi. Əvvəllər ona uduzsam da, bu dəfə finalda qalib gəldim. Klassik növdə isə həlledici görüşdə Qırğızıstan təmsilçisini məğlub etdim".
O, növbəti planları ilə bağlı sualı da cavablandırıb:
"Hələlik qarşıda heç bir yarışım yoxdur. Hazırda məşqçilik edirəm, tələbələrim var və onları növbəti turnirlərə hazırlayıram".
Xatırladaq ki, turnirdə +76 kq çəki dərəcəsində yarışan G.Zutova kəmər güləşi üzrə həm klassik, həm də sərbəst versiyada qızıl medal qazanıb.
