Idman.biz
Azərbaycanın çimərlik güləşçiləri Seneqalın paytaxtı Dakarda keçirilən Yeniyetmələrin Dördüncü Yay Olimpiya Oyunlarında uğurlu çıxışlarını davam etdirirlər.
İdman.Biz xəbər verir ki, bu gün milli komandamızın daha iki təmsilçisi mübarizəyə qoşulub və hər ikisi ilk iki qarşılaşmasında qələbə qazanıb.
70 kq çəki dərəcəsində çıxış edən Tunar Quliyev A qrupunda əvvəlcə Yeni Zelandiya təmsilçisi Vairangi Sarcenti, ardınca Anqoladan olan Diasivi Reanatonu məğlub edib.
Azərbaycan güləşçisi qrup mərhələsinin son görüşündə Puerto-Riko təmsilçisi Joab Cabril Karilyo Rodrigeslə qarşılaşacaq.
90 kq çəki dərəcəsində mübarizə aparan Elgün Kərimli isə B qrupunda ilk görüşündə Moldova təmsilçisi Artiom Kakeaya qalib gəlib. O, ikinci qarşılaşmada Mərakeşdən olan Nour Qannamı məğlub edib.
Kərimlinin qrup mərhələsində sonuncu rəqibi Braziliya təmsilçisi Allan Smit di Souza Beserra olacaq.
Qeyd edək ki, hər iki Azərbaycan güləşçisi qrup mərhələsinin son qarşılaşmasında da qələbə qazanacağı təqdirdə yarımfinala vəsiqəni təmin edəcək.
