İdman.biz
"Qarşılamağa gələnlərin çox olması bizi xoşbəxt edir və əlavə motivasiya verir".
İdman.biz xəbər verir ki, bunu Azərbaycanın U-23 millisinin sərbəst güləşçisi Arseniy Djioyev (86 kq) deyib.
22 yaşlı güləşçi Albaniyanın paytaxtı Tiranada keçirilən dünya çempionatında qazandığı bürünc medaldan danışıb. O bildirib ki, gələcəkdə daha yaxşı nəticələr üçün əlindən gələni edəcək: "Bu uğurda bütün komandanın, həkimlərdən tutmuş məşqçilərə qədər hər birinin əməyi var. Millinin baş məşqçisi Xetaq Qazimovun da bunda rolu böyükdür. O, Azərbaycan güləşinin inkişafı üçün ürəkdən çalışır. Bizim uğurlu olmağımız üçün hər bir dəstəyi verir. Əgər mən sizi sevindirmişəmsə çox razıyam. Azərbaycan mənim üçün ikinci Vətən oldu. Hamı məni çox mehriban qarşılayır. Bunun üçün də sizə hər zaman minnətdar olacam. Tez-tez xəbərləri izləyirəm. Azərbaycanın müxtəlif bölgələrində güləş məktəbləri açılır. Gənclər və İdman Nazirliyinə və Azərbaycan Güləş Federasiyasına gələcəyimiz üçün belə işlər gördüyü üçün təşəkkür edirəm. Bu aşağı yaşlı idmançılar üçün böyük stimuldur".
Qeyd edək ki, millimiz mundialda 1️ qızıl, 2️ gümüş və 1️ bürünc medalla yekunda 100 xalla İran və Yaponiyadan sonra komanda hesabında üçüncü olub.
Emin Ağa
İdman.biz
