Idman.biz
Rusiya Fiqurlu Konkisürmə Federasiyası (RFSF) Beynəlxalq Konkisürmə İttifaqına (ISU) fiqurlu konkisürən Veronika Jilina ilə mövcud olmayan müqavilə təqdim edib.
Bu barədə İdman.biz-ə rusiyalı idmançının Azərbaycan millisinə keçidinin alınmaması ilə bağlı vəziyyətlə tanış olan mənbə məlumat verib.
Çərşənbə axşamı Rusiya KİV-i idmançının Azərbaycan vətəndaşlığına olmasına, son iki mövsümdə Rusiyada yarışmamasına və qonşu ölkə federasiyasının bütün borclarını ödəməsinə baxmayaraq, ISU-nun Veronika Jilinanın Azərbaycan milli komandasına qoşulmasına qadağa qoyması barədə məlumat yayıb.
Mənbənin sözlərinə görə, federasiya ISU-ya Jilina ilə guya etibarlı müqavilə təqdim edib, amm əslində idmançı ilə tərəflər arasında belə bir razılaşma yoxdur. Bundan əlavə, Ukraynadakı hərbi münaqişə ilə əlaqədar sanksiyalara baxmayaraq, RFSF-nin ISU-nun qərarlarına təsir etmək gücündə olduğu bildirilib.
Həmçinin rusların inadında Azərbaycanla Rusiya arasında münasibətlərin korlanması mühüm rol oynaydığı vurğulanıb. Eyni səbəbdən RFSF daha bir fiqurlu konkisürənin Azərbaycan milli komandasına qoşulmasına mane olur. Adı açıqlanmasa da, onun Azərbaycan kökləri olduğu qeyd edilir.
Veronika Jilinaya gəlincə, Azərbaycan onun transferindən əl çəkməyəcək. Yaxın vaxtlarda, ABŞ-dan olan vəkilin işə qoşulması və məsələni hüquqi yolla həll edilməsi gözlənilir.
Qeyd edək ki, bu ilin sentyabr ayında Bakıda ISU rəhbərliyinin də iştirakı ilə Azərbaycan tarixində ilk dəfə fiqurlu konkisürmə üzrə yeniyetmələr arasında Qran Prinin birinci mərhələsi keçiriləcək. Azərbaycan tərəfi həmin ərəfədə Jilina ilə bağlı onunla danışıqlar aparmaq niyyətindədir.
Teymur Tuşiyev
İdman.biz
