İdman.biz
"Heyətimizdə yeni oyunçular var".
Bunu İdman.bizə Azərbaycan millisinin futzalçısı Emin Kürdov deyib.
O, Bosniya və Herseqovina yığması ilə keçirəcəkləri yoldaşlıq oyun öncəsi fikirlərini açıqlayıb. 40 yaşlı qapıçı bildirib ki, artıq ölkə futzalında yeni dövr başlayıb: "Buna görə də nəticə üçün bir az vaxt lazımdır. Yoldaşlıq oyunları bizim üçün təcrübə baxımından çox yaxşıdır. Dekabrda Bakıda Avropa çempionatının seçmə mərhələsin İsveç millisi ilə bizi ağır oyun gözləyir. Bu məqsədlə də Bosniya və Hersoqovina yığması ilə matçlar önəmlidir. Rəqib həm çox təcrübəlidir, həm də oyun praktikaları çoxdur. Lakin bu heç nə demək deyil".
Kürdov yaxşı nəticə üçün əllərindən gələni edəcəklərini vurğulayıb: "Vətənə yüksək nəticə ilə dönmək arzusundayıq. Heyətimiz zəif də deyil, sadəcə yeni oyunçularımız var. Komanda demək olar ki, tamamilə dəyişdirilib. Əcnəbi və təcrübəli oyunçularımız var idi ki, artıq onlar yoxdur. Ona görə də bizim üçün çətindir. Düşünürəm ki, hər şey yaxşı olar".
Qeyd edək ki, Azərbaycan millisi Bosniya və Herseqovina ilə noyabrın 4-də və 5-də yoxlama görüşü keçirəcək.
Banuçiçək Hüseynli
İdman.biz
