Idman.biz
Futzal üzrə UEFA Çempionlar Liqasının 2025-2026-ci il mövsümünün formatı və oyunların keçiriləcəyi tarixlər açıqlanıb.
İdman.biz xəbər verir ki, yeni mövsümün reqlamentində dəyişiklik edilib.
Hazırda Yüksək Liqanın başa çatmasına 2 tur qalıb və Azərbaycan çempionu hələ məlum deyil.
İlkin və əsas mərhələdə komandalar əvvəlki illərdəki kimi, hər birində 4 iştirakçı olmaqla 4 qrupa bölünəcək. Yenilik isə elit-raundun 1/8 və ¼ final mərhələləri ilə əvəzlənməsidir.
Yeni mövsümdə apreldə milli komandaların açıqlanan reytinq cədvəlinə uyğun olaraq (Portuqaliya, İspaniya, Qazaxıstan, Ukrayna) ilk 4 pillədə yer alan ölkələr hərəyə 2 komanda ilə təmsil olunacaq.
*Rusiya klubları yarışa buraxılmayacaqlar.
Təqvim
İlkin və əsas mərhələnin püşkatması: 3 iyul
İlkin mərhələnin oyunlar: 26-31 avqust
Əsas mərhələnin oyunları: 28 oktyabr – 2 noyabr
1/8 final mərhələsinin püşkatması: 6 noyabr
1/8 final mərhələsinin oyunları: 24 noyabr və 5 dekabr
¼ final oyunları: 23 fevral və 6 mart
Final mərhələsi: 7 və ya 8, 9 və ya 10 may
İlkin mərhələ (26-31 avqust 2025)
Reytin cədvəlinin aşağı pillələrində (iştirakçıların sayından asılı olaraq) yer alan komandalar mübarizəyə ilkin mərhələdən başlayacaq. Püşkdən asılı olaraq qruplarda komandaların sayı 4 və ya 3 olacaq.
Qrup qalibləri və saydan asılı olaraq ən yaxşı ikinci və ikincilər əsas mərhələyə yüksələcək.
Əsas mərhələ (26 oktyabr – 2 noyabr 2025)
A yolu
Burada turnirin sonuncu qalibi, ən yüksək reytinqə sahib 11 klub, eləcə də reytinq cədvəlinin 16-cı-19-cü sıralarında yer alan 16 komanda iştirak edəcək. İştirakçılar hər birində 4 komanda olmaqla 4 qrupa bölünəcək. Hər qrupdan bir klub oyunlara evsahibliyi edəcək. Reqlamentə əsasən, hər qrupda ilk 3 yeri tutan klub növbəti mərhələdə oynamaq hüququ qazanacaq.
B yolu
Reytin cədvəlinin 12-ci – 15-ci pilləsində qərarlaşan 4 klub, həmçinin 20-ci pillədən sonrakı (ilkin mərhələdə iştirak etməyənlər), eləcə də ilkin mərhələdən vəsiqə qazananlar iştirak edəcəklər. Burada da 16 klub 4 qrupa bölünəcək. Ancaq birinci pilləni tutan komandalar (cəmi 4 klub) mübarizəni davam etdirəcək .
1/8 final (24 noyabr və 5 dekabr 2025)
Elit-raund ləğv olunduqdan sonra, əsas mərhələdən sonra komandalar 1/8 və ¼ finalda iştirak edəcəklər. B yolunun qalibləri və A yolunun 3-cüləri A qrupunun birinci və ikinci pilləni tutmuş klubları ilə üz-üzə gələcəklər. Qalib 2 oyunun ümumi nəticəsinə əsasən müəyyənləşəcək. Cütlüklər püşkatma yolu ilə müəyyənləşəcək. Püşkatma isə noyabrın 6-da keçiriləcək.
¼ final (23 fevral və 6 mart 2026)
1/8 final mərhələsində keçiriləcək 2 oyunun ümumi nəticəsində qələbə qazanan komandalar ¼ finalda rəqib olacaqlar. Burada da qalib cütlüklər arasında keçiriləcək 2 oyunda müəyyənləşəcək.
Final turniri (7/8 və 9/10 may)
Final turnirində 4 komanda iştirak edəcək. Yenə yarımfinal oyunları keçiriləcək. Qaliblər finalda, məğlublar isə 3-cü yer uğrunda görüşdə üz-üzə gələcəklər.
İdman.biz
