Sport24.az
"Afinada iki məşq keçirdik. Demək olar, oyuna hazırıq". Sport24.az xəbər verir ki, bunu futzal üzrə Azərbaycan millisinin baş məşqçisi Vitali Borisov deyib.
O, AVRO-2026-nın əsas mərhələsində Yunanıstanla Afinada keçiriləcək bugünkü görüş barədə fikirlərini azfutzal.az-a açıqlayıb:
"Düzdür, heyətimizdə yüngül zədəli - Kamran Hacıyev, Nihad İsmayılov və Murad Quluzadə - futzalçılar var. Amma oynayacaq durumdadırlar. Əsasən standart vəziyyətlər, taktiki-texniki tapşırıqlar üzərində işlədik. Çalışdıq ki, uşaqları çox yormayaq. Çünki yol da qət etmişik. Həm də "4-lük"ləri müəyyənləşdirdik".
Borisov yığmanın qələbə iddiasından danışıb:
"Meydana ancaq qələbə qazanmaq üçün çıxacağıq. Bu görüş tək bizim üçün yox, rəqibə də finala bərabər olacaq. Bizi gərgin oyun gözləyir. Yunanıstan millisi 4 gün əvvəl Xorvatiya ilə qarşılaşıb. Həmin oyunu izləmişik. Onlar bizə qarşı eyni oyun üslubuna çıxış etməyəcəklər. Xorvatlarla görüşdə müdafiədən oynadılar, qapıçıları da yaxşı dayandı. Bu dəfə pressinq edəcəklər. Yenə deyirəm, doğma meydanda oynayırlar, qələbə qazanmaq üçün əllərindən gələni edəcəklər. Məqsəd eynidir. Ümid edirəm ki, səfərdən 3 xalla dönəcəyik".
Qeyd edək ki, qarşılaşma Bakı vaxtı ilə 21:00-da başlayacaq.
