İdman.biz
"Komandanın ilk oyuna qədər 100 faiz hazır olacağına inanıram".
Bunu İdman.bizə futzal üzrə "Araz-Naxçıvan" klubunun baş məşqçisi Vitali Borisov deyib.
O, UEFA Çempionlar Liqasının ilkin mərhələsinə hazırlıqlarını və gözləntilərini açıqlayıb. Gənc mütəxəssis bildirib ki, oyunlar təbii ki, çətin keçəcək: "Bütün komandalar eyni vəziyyətdədir. İlk matçımız Şimali İrlandiyanın "Sparta Belfats" klubuna qarşı olacaq. Bu rəqib barədə məlumat toplamaq olduğca çətindir. Estoniya və İsveç klublarını isə tanıyırıq. Onlarla bağlı məlumatımız yetərincə var. Lakin bunlara baxmayaraq, komandamın bu matçlarda qələbə qazanacağını düşünürəm".
Borisovun sözlərinə görə, artıq təlim-məşq toplanışını yekunlaşdırıblar: "Komandamıza yeddi yeni oyunçu cəlb etmişik. Bunlardan üçü serbiyalı, dördü isə braziliyalıdır. Bundan əlavə, "Baku Fire"dən Kənan Manafovu, "Neftçi"dən Ülvi Əliyevi də heyətə dəvət etmişik. Yeni gələnlərin səviyyələri yaxşıdır. Hazırda iki zədəli oyunçumuz var. Onlar komandadan ayrı məşq edirlər. Amma ilk görüşdə artıq bizə qoşulacaqlar. Yaxşı nəticə qazanmaq üçün hansısa problem yaşamayacağıq. Son yoxlama görüşündə uşaqlar çox yaxşı performans göstərdilər. Gənc futzalçılarımıza da şans yaratmışıq. Bir neçə mövqeni daha da gücləndirmək niyyətindəyik. Komandada qalmaq istəyən oyunçuları saxlayamaq fikrindəyik".
Qeyd edək ki, Azərbaycan çempionu avqustun 21-də "Sparta Belfats" (Şimali İrlandiya), ertəsi gün Estoniya çempionu "Sillamae Silla", avqustun 24-də isə İsveçin "Uddevalla" klubu ilə qarşılaşacaq. Yalnız qrup liderləri əsas mərhələyə vəsiqə qazanacaq.
Banuçiçək Hüseynli
İdman.biz
