U-19-un üzvü: "İlkin mərhələdəki rəqiblərimizlə bu komandaları müqayisə etmək olmaz"

"Bu turnirin hazırlığına martın 16-dan başlamışıq. Bakıda 8 günlük təlim-məşq toplanışı keçirdik". Sport24.az xəbər verir ki, bunu Azərbaycanın U-19 millisinin futzalçısı Pünhan Qasımzadə Azfutzal.az-a açıqlamasında deyib. 

Gənc oyunçu Avropa çempionatının əsas seçmə mərhələsi çərçivəsində Bosniya və Herseqovinaya qarşı keçiriləcək matç barədə fikirlərini bildirib:

"Baş məşqçimiz bu müddətdə əsasən fiziki məşqlər və taktiki çalışmalar üzərində işləməyi tapşırdı. Faydalı bir hazırlıq prosesi oldu. Ən əsası, zədələnən olmadı. Hazırlıq zamanı 2 oyun keçirdik. Onlardan biri yoxlama, digəri Yüksək Liqanın qarşılaşması idi. Xüsusilə də lider "Baku Fire"lə görüşümüz daha maraqlı keçdi. Ardıcıl 2 oyun keçirməyimizdə məqsəd bu turnirdəki sıx oyun qrafikinə uyğunlaşmaq və güclü rəqiblərə qarşı hazır olmaq idi. Yanvarda Avropa çempionatının ilkin mərhələsində iştirak edən heyətlə müqayisədə 2 dəyişiklik var.

Bu gün uzun yol yorğunluğuna baxmayaraq, oyunöncəsi son məqşimizə çıxdıq. Bu dəfə sırf taktiki gedişlər və standart vəziyyətlərin icrası üzərində işlədik. Yorğun olsaq da, əhval-ruhiyyəmiz yaxşıdır.

Qrup oyunlarına gəldikdə, ilk rəqibimiz Bosniya və Herseqovinadan olan həmyaşıdlarımızdır. Bilirik ki, bizi gərgin qarşılaşma gözləyir. İlkin mərhələdəki rəqiblərimizlə bu komandaları müqayisə etmək olmaz. Ona görə daha məsuliyyətli və ciddi olmalı, mümkün qədər az səhv etməliyik. Təbii ki, rəqiblərə hörmət edirik, ancaq biz də bura uğurlu nəticə qazanmaq üçün gəlmişik".

Qeyd edək ki, bu gün Xorvatiyadakı Ribnjak İdman Arenasında keçiriləcək görüş Bakı vaxtı ilə saat 19:00-da start götürəcək.