Millimizin baş məşqçisi: “Səfərə tam heyətlə yollana bilməyəcəyik”

"Bu gün hazırlığa başladıq. Komanda Bakıda 3 məşq keçəcək".

İdman.biz xəbər verir ki, bunu futzal üzrə Azərbaycan millisinin baş məşqçisi Vitali Borisov deyib.

O, yığmanın bu gün keçirilən məşqindən əvvəl azfutzal.az-a açıqlama verib: "Bu da daha çox taktiki planda olacaq və standartların yerinə yetirilməsi üzərində işləyəcəyik. Noyabrın 3-də Bosniya və Herseqovinaya yola düşəcəyik. Orada oyundan əvvəl bir məşqimiz olacaq. Daha sonra 2 görüş keçirəcəyik".

Baş məşqçi heyətə də toxunub: "Səfərə tam heyətlə yollana bilməyəcəyik. Bilirsiniz ki, qapıçımız Rövşən Hüseynli karyerasını Qazaxıstanda davam etdirir. Düşündük ki, o klubunda qalsın və çempionat oyunlarında iştirak etsin. Çünki Qazaxıstan çempionatının oyunları davam edir. Eləcə də zədə və digər səbəblərdən bu toplanışa qatılmayan futzalçılarımız var.
Ümumi götürdükdə, komandada vəziyyət yaxşıdır, uşaqlar istəklidirlər. Artıq Azərbaycan çempionatı da start götürüb və 3 tur oynanılıb. Bu da futzalçıların oyun təcrübəsi qazanması, milliyə daha hazırlıqlı gəlməsi baxımından önəmlidir".

Mütəxəssis yoxlama oyunlarının əhəmiyyətini vurğulayıb: "Təbii ki, hər iki yoldaşlıq oyunu İsveçlə dekabrın 17-də Bakıda keçirəcəyimiz rəsmi matça hazırlıq xarakteri daşıyır. Rəqibimiz yaxşı komandadır. "Araz-Naxçıvan"la UEFA Çempionlar Liqasının ilkin mərhələsində İsveç çempionuna qarşı oynamışıq. Həmin heyətdə millinin 5-6 futzalçısı yer almışdı. Demək olar, son 5-6 ildə milliləri eyni heyətlə çıxış edir. Bizi çətin qarşılaşma gözləyir".

İdman.biz