Idman.biz
"Kayrat"ın baş məşqçisi Rafael Urazbaxtin komandasının UEFA Çempionlar Liqasının dördüncü turunda İtaliyanın "İnter" komandası ilə qarşıdakı oyunu barədə danışıb.
İdman.Biz bildirir ki, komandalar noyabrın 5-də İtaliyanın Milan şəhərindəki "San Siro" ("Cüzeppe Meazza") stadionunda oynayacaqlar.
"Hər şey yaxşı gedir, "İnter"lə oyuna müsbət emosiyalarla yaxınlaşırıq. Qazaxıstanda çempionluq titulumuzu təsdiqlədik və indi sakitcə hazırlaşırıq. Rəqiblərimizin gücünü başa düşürük, amma bu, özümüzü sübut etmək və belə güclü rəqibə qarşı səviyyəmizi görmək üçün daha bir fürsətdir.
Rəqib komanda təcrübəlidir, onlar İtaliya liqasında ikinci yerdədirlər və titul uğrunda mübarizə aparırlar. Onlar yüksək səviyyəli rəqibdir, həmçinin Çempionlar Liqası qrupunda məğlubiyyətsizdirlər. Nə deyə bilərəm? Çətin olacaq, amma cəsarətli, intizamlı və mütəşəkkil olmaq bizim üçün vacibdir. Və əlimizə düşən fürsətlərdən maksimum yararlanmalıyıq", - Urazbaxtin bildirib.
