"Artıq 4 gündür bu oyunun hazırlığını davam etdiririk. Bakıdakı 2 günlük məşqlərdən sonra son 2 məşqimizi Pula şəhərində reallaşdırdıq". Sport24.az xəbər verir ki, bunu Azərbaycan millisinin futzalçısı Fərid Atakişiyev deyib.

Avropa çempionatının əsas mərhələsində Xorvatiyanın qonağı olacaq yığmamızın təcrübəli oyunçu fikirlərini azfutzal.az-a açıqlayıb: "Təbii ki, səfərə erkən yollanmağımız zala yaxşı bələd olmağımız və vaxta uyğunlaşmağımız baxımından vacib idi. Bu cür oyuna hazırlaşmaq üçün 4 gün az olsa da, maksimum istifadə etməyə çalışdıq".

Futzalçımız komandanın istəkli olmasından da danışıb: "Komanda olaraq istəkliyik. Əlbəttə, bilirik ki, bizi ağır oyun gözləyir. Xorvatiya millisi hər zaman öz dəsti-xətti ilə seçilib. Güclü, iddialı rəqibdir, qrupun favoritidir. Bu görüşdən sonra Bakıda Yunanıstanla qarşılaşacağıq. Son illər inkişaf edən Yunanıstan millisi seçmə məthələyə iddialı başlayıb. İlk oyunda səfərdə İsveçi məğlub etməkləri bunun göstəricisidir. Təbii ki, Bakıdakı görüş fərqli olacaq".

O, qarşıdakı görüşdən danışıb: "İndiki məqamda bütün diqqətimizi Xorvatiya ilə oyuna yönəltmişik. Rəqib komandanı məşqçilər korpusu analiz edib. Zəif, istifadə edə biləcəyimiz cəhətlərini deyiblər. Heyətimizdə həm gənc, həm də təcrübəli futzalçılar var. Əl-ələ verib uğurlu nəticə qazanmaq üçün mübarizə aparacağıq. Komandamızın tam formalaşması üçün zamana ehtiyac var. Hər şeyin yaxşı olacaq".

Qeyd edək ki, Xorvatiya – Azərbaycan matçı Bakı vaxtı ilə saat 22:15-də başlayacaq.