Idman.biz
"Dövlətimizin başçısı idmana daim böyük diqqət göstərir. İş qrafiki çox sıx olmasına baxmayaraq, çalışdı ki, bizi tez bir zamanda qəbul etsin. Biz də öz növbəmizdə dövlətimizin başçısına minnətdarlığımızı bildirdik".
İdman.biz xəbər verir ki, bu sözləri AZƏRTAC-a açıqlamasında Bakıda keçirilmiş minifutbol üzrə dünya çempionatının qalibi olan Azərbaycan milli komandasının baş məşqçisi Elşad Quliyev deyib.
Mütəxəssis bildirib ki, yenidən Prezident İlham Əliyevin qəbulunda olmaq çox qürurverici hissdir: "2021-ci ildə Avropa çempionu olduğumuz zaman da dövlətimizin başçısı bizimlə görüşmüşdü. Düşünürəm ki, bundan möhtəşəm gün ola bilməz. Prezident İlham Əliyev komandamızın bütün oyunçularını tanıyır. O, mundialda keçirdiyimiz dörd matçın hamısını izlədiyini və hər bir görüşümüzün olduqca maraqlı alındığını söylədi. Bu, bizim üçün doğrudan da çox xoşdur. Çox sağ olsun ki, hər zaman qayğısını hiss etdirir".
Milli Gimnastika Arenasında keçirilən turnirin təşkilatçılığına da toxunan Quliyev hər şeyin yüksək səviyyədə olduğunu vurğulayıb: "Ev sahibi olaraq qürur hissi keçirdik. Tamaşaçılar oyunlarımıza rəng qatırdılar. Şükürlər olsun ki, meydança baxımından da hansısa problem yaşamadıq".
Baş məşqçi komandanın növbəti hədəflərindən də söz açıb: "Prezident İlham Əliyev görüş zamanı bildirdi ki, bu uğurun davamını gətirmək lazımdır. Təbii ki, dayanmaq olmaz. Fikirləşirik ki, bünövrəmiz möhkəm və sağlam qurulduğu üçün axıra qədər getməyə gücümüz var. Gələn il Avropa çempionatı keçiriləcək. Yəqin ki, bir neçə aydan sonra məşqlərə başlayacağıq. Bu turnirdə də əlimizdən gələni edəcəyik. Ümid edirəm ki, xeyirlisi olar".
Qeyd edək ki, Azərbaycan millisi finalda Macarıstana 4:2 hesabı ilə qalib gələrək dünya çempionu olub.
İdman.biz
