Idman.biz
"Aris"lə oyunlar barədə indidən danışmaq tezdir. Müəyyən təhlillər aparacağıq".
İdman.biz xəbər verir ki, bu sözləri AZƏRTAC-a açıqlamasında "Araz-Naxçıvan"ın baş məşqçisi Elmar Baxşıyev deyib.
Mütəxəssis hazırda bütün fikirlərini komandanın hazırlığına yönəltdiklərini bildirib: "Hər şey kollektivin hazırlığından asılıdır. Rəqib kimi, bizim də mərhələ adlamaq şansımız var. Şansımızın az və ya çox olduğunu oyunlar göstərəcək. Ancaq əmin ola bilərsiniz ki, komanda olaraq sona qədər mübarizə aparacağıq. "Araz-Naxçıvan" ilk dəfə avrokuboklarda mübarizə aparacaq, ancaq heyətimizdə bu cür oyunların iştirakçısı olmuş kifayət qədər futbolçu var. Onların təcrübəsinə inanırıq. Uğur qazanmaq üçün bütün gücümüzdən, potensialımızdan istifadə edəcəyik. Futbol proqnozları sevmir. Yuxarıda da qeyd etdiyim kimi, rəqiblə bağlı araşdırma aparacağıq. Əlbəttə, müəyyən bilgimiz var. Ancaq bunlar ilkin informasiyadır. Rəqib də boş dayanmır, həm transferlər edir, həm də yoxlama oyunları keçirir. Zamanla onların zəif və güclü tərəflərini öyrənib, komandaya məlumat verəcəyik".
Naxçıvan təmsilçisinin baş məşqçisi Türkiyənin Ərzurum şəhərində davam edən təlim-məşq toplanışını da dəyərləndirib: "Hazırlıq prosesi plan üzrə gedir. Səhvlərimizi, çatışmazlıqlarımızı görür, təhlillər aparır, müəyyən qənaətə gəlirik. Çalışırıq ki, toplanışın hər günündən maksimum istifadə edək, komanda rəsmi oyunlara qədər hazır olsun. Gün ərzində 2 məşq keçirik. Dünən yoxlama oyununda qüvvəmizi sınadıq. Bu matçda əsas istəyimiz xətlərarası əlaqəni yoxlamaq, yeni kollektivin bir-birinə adaptasiya edilməsi idi".
Qeyd edək ki, UEFA Konfrans Liqasında II təsnifat mərhələsinin görüşləri iyulun 24-ü və 31-də oynanılacaq. "Araz-Naxçıvan" ilk matçı evdə, cavab qarşılaşmasını isə səfərdə keçirəcək.
İdman.biz
