Bakıda minifutbol bayramı: Milli komandamızın növbəti şansı

Sabah minifutbol üzrə dünya çempionatının startı veriləcək.

İdman.biz xəbər verir ki, tarixdə ilk dəfə Azərbaycanda təşkil olunan yarışın oyunlarına Milli Gimnastika Arenası ev sahibliyi edəcək.

Planetin ən güclü 32 komandası 11 gün ərzində mükafatçıları müəyyənləşdirəcək. 5-ci dəfə təşkil olunan mundialın son medalçıları da Bakıya gəlib. Son çempion Rumıniya, vitse-çempion Qazaxıstan və iki il əvvəl bürüncə yiyələnən Macarfıstan da iştirakçılar sırasındadır.

Ümumiyyətlə, indiyədək dünya çempionu olan 4 yığmadan üçü 2-ci titul üçün mübarizə aparacaq. Bunlar
Çexiya, Rumıniya və ABŞ komandalarıdır. Sabiq çempionlardan yalnız Meksika mundiala gəlməyib. Finala hamıdan çox – 3 dəfə çıxan şimali amerikalıları son anda İndoneziya əvəzləyib.

Milli Gimnastika Arenasına çıxacaq üç çempion və Hindistan tarixlərində 5-ci dəfə dünya çempionatına qatılacaq. Bəhreyn, Çad, İndoneziya, Mavritaniya, Polşa, Sloveniya, Türkiyə və Özbəkistan isə mundiallarda debüt edəcək.

Çempionatın iştirakçıları qrup mərhələsində səkkiz "dördlük"də mübarizə aparacaq. Millimiz meydan sahibi kimi A qrupunda yer alıb. Elşad Quliyevin baş məşqçisi olduğu komanda Mavritaniya, Sloveniya və Bəhreynlə mübarizə aparacaq.

A qrupu: Azərbaycan, Mavritaniya, Sloveniya, Bəhreyn
B qrupu: Rumıniya, Fransa, Çad, Özbəkistan,
C qrupu: Macarıstan, Ukrayna, İngiltərə, Türkiyə
D qrupu: Slovakiya, Bolqarıstan, Portuqaliya, Hindistan
E qrupu: Meksika, Monteneqro, Tailand, Kosta Rika
F qrupu: Qazaxıstan, ABŞ, Bosniya və Herseqovina, Polşa,
G qrupu: Çexiya, Gürcüstan, BƏƏ, Argentina.
H qrupu: Serbiya, Qana, İspaniya, İsrail

Millimiz ilk görüşünə sabah çıxacaq. Rəqib Asiya təmsilçisi olacaq. İki gün sonra Sloveniya, son turda Mavritaniya ilə qarşılaşacaq yığmamız 1/8 finala vəsiqə üçün mübarizə aparacaq.

21 may
21:45. Azərbaycan – Bəhreyn
23 may
20:45. Sloveniya – Azərbaycan
25 may
19:30. Azərbaycan – Mavritaniya

Öz qruplarında ilk iki yeri tutan komandalar mükafatlar uğrunda yoluna davam edəcək. Azərbaycan millisi iki il əvvəl debüt etdiyi mundiallarda tarixi uğur qazanmağa çalışacaq.

BƏƏ-dəki çempionatın qrupunda İraqı 2:0, Misiri 4:1, Küveyti 3:1 hesabı ilə məğlub edən komandamız 1/8 finala G qrupunun qalibi kimi yüksəlmişdi. Portuqaliyanı 3:0, Bolqarıstanı 3:1 hesabı ilə yenən yığmamız elə ilk cəhddə yarımfinala qədər irəliləyib. Bu mərhələdə Qazaxıstana 2:3, 3-cü yer uğrunda qarşılaşmada Macarıstana 1:3 hesablı ilə uduzan Quliyevin yetirmələri özünün ilk dünya çempionatını 4-cü yerdə başa vurublar. Mükafatın bir addımlığında qalan komandamız bu dəfə sadəcə mükafat deyil, çempionluğa köklənib.

Qeyd edək ki, dünya çempionatının mayın 21-də təşkil olunacaq açılış mərasimi saat 19:00-da başlayacaq.

Vüqar Xeyrullayev
İdman.biz