Idman.biz
Bakıda keçirilən minifutbol üzrə dünya çempionatının I turunda Slovakiya – Hindistan matçı mundiallar tarixinə düşüb.
İdman.biz xəbər verir ki, Bakı Gimnastika Arenasındakı görüş 15 və ya daha çox top fərqinin qeydə alındığı 8-ci matç olub.
5-ci dəfə keçirilən dünya çempionatlarının tarixində 7 belə darmadağın yaşanmışdı. Hindistanın Slovakiyaya uduzması bu siyahıda 8-ci böyükhesablı nəticə olub.
Ümumiyyətlə, Hindistan millisi mundialların "ən asan yemi" sayılır. 8 darmadağından 5-i asiyalıların iştirakı ilə olub. Qvatemala, Sinqapur və Kolumbiya da belə durumla üzləşib. Sonuncular pley-off mərhələlərinin ən ağır məğlubiyyətini alıblar. 1/8 final görüşündə 22:0 hesabı qeydə alınıb.
Mütləq rekord isə 10 il əvvələ təsadüf edib. 3 oyunda 83 qol buraxan Hindistan Meksikaya 0:33 hesabı ilə uduzub. Asiyalılarla görüşlərdə Almaniya 29, Rumıniya isə 21 qol vurub.
DÇ-2015. Hindistan – Meksika – 0:33
DÇ-2015. Hindistan – Almaniya – 1:29
DÇ-2019. Macarıstan – Kolumbiya – 22:0
DÇ-2015. Rumıniya – Hindistan – 21:0
DÇ-2023. Meksika – Qvatemala – 19:1
DÇ-2019. Çexiya – Sinqapur – 17:0
DÇ-2023. Qazaxıstan – Hindistan – 16:0
DÇ-2025. Slovakiya – Hindistan – 15:0
Vüqar Xeyrullayev
İdman.biz
