Idman.biz
"Oyun asan keçmədi. Belə olacağını da gözləyirdik. Çünki "Kəpəz" bu il ev oyunlarında çox yaxşı nəticə göstərir. Nə "Qarabağ"a uduzmuşdular, nə də "Turan Tovuz"a. 8 matçın heç birində xalsız qalmamışdılar".
İdman.biz Futbolxeber.az-a istinadən xəbər verir ki, bunu "Zirə"nin yarımmüdafiəçisi Rüstəm Əhmədzadə Azərbaycan Premyer Liqasının 32-ci turunda "Kəpəz"i səfərdə 1:0 hesabı ilə məğlub etdikləri oyun barədə danışarkən deyib.
O, artıq minimum vəzifənin öhdəsindən gəldiklərini bildirib: "Artıq medalçılar sırasında olmağı, avrokuboklara vəsiqəni təmin etmişik. Lakin bu, qarşımıza qoyulan minimum hədəf idi. Məqsədimiz Avroliqada oynamaqdır. Bunun üçün ilk növbədə çempionatı ikinci pillədə başa vurmalıyıq".
25 yaşlı futbolçu kuboku "Qarabağ"ın qazanmasını istəyir: "Avroliqaya yollanmaq üçün ilk növbədə gümüş medalı təmin etməliyik. Daha sonra "Qarabağ"ın kubokdakı çıxışını izləyəcəyik. Əlbəttə, finalda "Qarabağ"a azarkeşlik edəcəyik. Niyə də yox?! Çünki bu halda ikinci yeri tutmaqla Avroliqaya yollana bilərik. Avrokuboklar perspektivi baxımından bu, daha yaxşı variantdır".
Əhmədzadə növbəti turda "Turan Tovuz"a qarşı keçirəcəkləri oyundan da söz açıb: "Matç heç də asan keçməyəcək. Hamı xal ehtiyatını artırmaq istəyir. Maraqlı qarşılaşma olacaq. Avrokuboklara vəsiqəni təmin etsək də, hədəfimiz yenə də dəyişmir. Hər görüşdə qələbə qazanmaq istəyirik".
İdman.biz
