“Zirə”nin mərhələ keçmək şansı – TƏHLİL

"Zirə" avrokubok mövsümünə səfər qələbəsi ilə başlayıb.

İdman.biz xəbər verir ki, Moldovada "Şerif"in qapısından cavabsız qol keçirən Bakı klubu tarixində ilk dəfə ikioyunluq duelə belə nəticə ilə start verib.

Azərbaycan futbolunda isə 9-cu dəfə belə hadisə yaşanıb. Bunadək 8 dəfə təmsilçilərimiz duelin rəqib meydanındakı ilk görüşündə 1:0 hesabına sevinib.

Finlandiyadakı ilk

İlk oyunda səfərdə bir qolla qalib gələn birinci klubumuz "Qarabağ" olub. Ağdam təmsilçisi 2009-cu ildə Finlandiyadan sevinclə dönüb. Qurban Qurbanovun komandası "Honka"nı Bakıda da məğlub edə bilib.

Sadıqovun "Qarabağ"da yaşadıqları

Ümumiyyətlə isə "Qarabağ" hamıdan çox – 6 dəfə cütün ilk matçında meydan sahiblərini 1:0 hesabı ilə məğlub edib. "Zirə"nin baş məşqçisi Rəşad Sadıqovun uzun illər şərəfini qoruduğu Ağdam klubunun bu qələbələrinin hamısına şahid olub. Sadiqovun da heyətində olduğu komanda səfərdə 1 qolla üstələdiyi bütün rəqiblərini Bakıda mübarizədən kənarlaşdırıb. Bunların ikisi Çempionlar Liqası, dördü Avropa Liqasında baş verib. "Qarabağ" altı rəqibdən 5-ni Bakıda da məğlub edib. Yalnız "Olimpiya" ölkəmizi məğlubiyyətsiz tərk etsə də, ilk oyundakı qələbə çempionumuza yetərli olub.

5 il sonra

Amma uzun müddət idi ki, Azərbaycan klubları ilk matçda belə nəticə əldə etmirdi. Bunu bacaran son komanda "Neftçi" idi. Bakılılar 5 il əvvəl Rusiyada "Arsenal"ı üstələyib. Paytaxtda isə qonaqlar üç cavabsız qolla darmadağın olub. 5 il sonra "Zirə" səfərdə 1:0 hesabı ilə qələbəyə sevinib.

Üç darmadağın

Ümumiyyətlə isə üç dəfə Azərbaycan komandaları səfərdəki 1:0-dan sonra evdə rəqibini darmadağın edib. Buna ilk dəfə "Qarabağ" nail olub. Qurban Qurbanovun yetirmələri Malta "Valletta"sını Çempionlar Liqasında 4 qola qonaq edib. "Yanq Boyz" da ağdamlılardan "üç sillə yeyib". Sonuncu darmadağın isə "Neftçi"nin "Arsenal"ı keçməsidir.

Yeganə istisna

Rəqib meydanında bir topla qalib gələn, amma mərhələ keçə bilməyən yeganə Azərbaycan klubu "İnter"dir. İndiki "Şamaxı" İsveçdə yendiyi "Elfsborq"u keçməyib. Bakıda eyni hesabla uduzan təmsilçimiz penaltilər seriyasında üzülüb.

"Zirə" üçün 87,5 faiz

Göründüyü kimi əvvəlki 8 belə hadisədən 7-də mərhələni Azərbaycan klubu keçib. Bu, 87,5 faiz deməkdir. "Şerif"in "Elfsborq" kimi uğur əldə etməsi 12,5 faizə bərabərdir. Bir sözlə, Rəşad Sadıqovun yetirmələrinin mərhələ keçmək şansı 7 dəfə çoxdur. Əvvəlki 8 belə hadisədə cavab oyunlarının nəticələrinə baxsaq, 6 qələbə, 1 heç-heçə və 1 məğlubiyyət qeydə alınıb. Yəni "Zirə"nin qələbə ilə mərhələ keçmək şansı 75, heç-heçə ilə tur adlaması 12,5 faiz sayılır.

Səfərdə 1:0-a sevinən Azərbaycan klublarının cavab oyunları:

2009/10 mövsümü
Avropa Liqası
"Qarabağ" – "Honka" – 2:1
2010/11 mövsümü
Avropa Liqası
"Qarabağ" – "Visla" - 3:2
2013/14 mövsümü
Avropa Liqası
"Qarabağ" – "Metalurq" – 1:0
2014/15 mövsümü
Çempionlar Liqası
"Qarabağ" – "Valletta" – 4:0
Avropa Liqası
"İnter" – "Elfsborq" – 0:1, p. 3:4
2015/16 mövsümü
Avropa Liqası
"Qarabağ" – "Yanq Boyz" – 3:0
2018/19 mövsümü
Çempionlar Liqası
"Qarabağ" – "Olimpiya" – 0:0
2019/20 mövsümü
Avropa Liqası
"Neftçi" – "Arsenal" – 3:0