Sport24.az
"Hazırlıq prosesi plan üzrə davam edir. Komandada ab-hava yaxşıdır, futbolçular məşqlərə yüksək motivasiya ilə yanaşırlar. Hələ görüləsi işlər var, amma ümumi vəziyyətdən razıyıq". Bu sözləri Sport24.az-a açıqlamasında "Zirə"nin kapitanı Qismət Alıyev deyib.
29 yaşlı futbolçu komandasının qış hazırlığından danışıb:
"Yoxlama oyunu bizim üçün nəticədən çox oyun baxımından önəmli idi. Müəyyən epizodlarda istədiklərimizi gördük. Bu cür qarşılaşmalar bizə səhvləri vaxtında görmək və onları vaxtında aradan qaldırmaq üçün lazımdır".
O, cari mövsüm barədə də fikirlərini bölüşüb:
"Bu, mövsüm həqiqətən çox gərgin və rəqabətlidir. Hazırda turnir cədvəlində 3-cü pillədəyik, amma rahatlaşmaq olmaz. Qarşıda hələ vacib oyunlar var. Məqsədimiz stabil oyun göstərmək və mövsümün sonunda avrokuboklara vəsiqə qazanmaqdır. Buna gücümüz və potensialımız var".
Qeyd edək ki, Antalyada təlim-məşq toplanışında olan "Zirə" srağagün yoxlama oyununda Rumıniyanın "Çiksereda" komandası ilə heç-heçə edib - 3:3.
