Idman.biz
Misli Premyer Liqasının daha bir mükafatçısı bəlli olub.
İdman.biz xəbər verir ki, "Zirə" ilk "üçlük"də yerini təmin edərək avrokuboklara da vəsiqə qazanıb.
Sağ olsun "Şamaxı"
"Zirə"nin buna XXXII turda Tovuzda keçiriləcək oyunlardan birində nail ola biləcəyi öncədən (https://www.idman.biz/az/news/football/74090) bəlli idi. Rəşad Sadıqovun baş məşqçisi olduğu komanda "Kəpəz"lə bugünkü matça çıxmadan mükafata sahib çıxıb. Buna 4-cü pillədəki "Turan Tovuz"un xal itirməsi səbəb olub. "Şamaxı" səfərdəki 1:1 hesablı heç-heçə ilə "Zirə"yə medal və Avropaya bilet qazandırıb. 61 xalı olan qəsəbə klubu 4-cü yerdən 12 xal uzaqlıqdadır. Sona 4 tur qalmış "Turan Tovuz" xallara görə "Zirə"yə çatmaq imkanını qorusa da, əlavə göstəricilərdə bakılılar öndə olacaq.
4-cü medal
"Zirə" tarixində 4-cü dəfə Premyer Liqanın medalını qazanıb. 2015/16 və 2023/24 mövsümlərində gümüşə sahib çıxan paytaxt təmsilçisi 2021/22 mövsümündə bürünclə kifayətlənib. "Qartallar"ın hazırda hətta qızıla nəzəri şansları qalıb. Amma bu ehtimal yəqin ki, bu turda bitəcək. Gümüşlə bürünc arasında qalacaq komandanın növbəti turlarda ikinciliyi təmin etməsi gözləniləndir.
Sadıqovdan het-trik
"Zirə" 4 mükafatdan üçünü Rəşad Sadıqovla qazanıb. 2021/22 mövsümündə ilk bürüncünə, ötən çempionat gümüşə qovuşan gənc mütəxəssis 2020-ci ilin yayından çalışdığı komandanı 3-cü dəfə "üçlüy"ə qaldırıb.
4-cü Avropa səfəri
4-cü mükafat avrokuboklara 4-cü vəsiqə olub. Düzdür, 2015/16 mövsümündəki gümüş lisenziya qalmaq və UEFA turnirinə qatılmağa yetərli ola bilməyib. Əvəzində 2017/18 mövsümündə debüt getçəkləşib. Avropa Liqasındakı debütdən 5 il sonra komanda Konfrans Liqası həyəcanı da yaşayıb. 3-cü – ötən ildəki cəhd Avropa Liqasında başlayıb və Konfrans Liqasına qədər davam edir. Çempionlar Liqası xəyalı möcüzə olan "Zirə"nin digər iki turnirdən hansına gedəcəyi kubokun mayın 31-dəki finalından asılı olacaq.
Qeyd edək ki, bu gün keçiriləcək "Kəoəz" – "Zirə" matçı Tovuzda baş tutacaq.
Vüqar Xeyrullayev
İdman.biz
