Sport24.az
Azərbaycan Kubokunun 1/8 final mərhələsində bu gün üz-üzə gələcək "Zirə" və "Neftçi" daha əvvəl bu turnirdə 10 dəfə qarşılaşıblar. Sport24.az xəbər verir ki, əvvəlki matçların 4-də qəsəbə təmsilçisi, 3-də "ağ-qaralar" qalib gəlibsə, 3 görüşdə heç-heçə qeydə alınıb.
Lakin topların nisbətində "Neftçi" üstün tərəfdir - 9:6
İlk belə duel 2016/2017 mövsümünə təsadüf edib. 1/4 final mərhələsindəki oyunların birində "Neftçi" üç cavabsız qolla qalib gəlib, digərində rəqibinə uduzub - 1:2.
Tərəflər 2017/2018 mövsümündə də eyni raundda bir-birinə rəqib olub. Bu dəfə də "ağ-qaralar" sevinən tərəf olub - 2:0, 0:1.
2020/2021 və 2021/2022 mövsümündə "Zirə" mərhələ adlayıb. 2020/2021 mövsümündə 1/4 finalda (0:0, 1:0), 2021/2022 mövsümündə (0:0,0:0, pen:4:2) yarımfinalda "qartallar" qalib gəlib.
Nəhayət, 2022/2023 mövsümündə "Neftçi" 1/4 finalda bu rəqibi məğlub edib - 3:1, 0:1.
Qeyd edək ki, bu gün baş tutacaq matç saat 19:00-da start götürəcək.
