Report.az
"Zirə"nin futbolçusu Ceyhun Nuriyev cari mövsüm Misli Premyer Liqasında ikinci yeri təmin etmələrinə münasibət bildirib.
"Report"a açıqlama verən paytaxt təmsilçisinin yarəmmüdafiəçisi XXXIII turda "Turan Tovuz"a qalib gəldikləri oyundan danışıb:
"Turan Tovuz" güclü futbolçulardan təşkil olunmuş kollektivdir. Şükürlər olsun ki, qalib gəlməyi bacardıq. Ümumilikdə mövsüm çox ağır keçdi. Bir-birindən çətin rəqiblərlə qarşılaşdıq. Mövsüm ərzində əziyyət çəkdik və amansız mübarizədən sonra ikinci yeri təmin etdik. Düşünürəm ki, maraqlı yarış oldu. Qarşıda hələ 3 tur var. Növbəti matçlarımızı da qələbə ilə başa vurmaq istəyirik".
Yarımmüdafiəçi komandasının avrokuboklarda uğurlu çıxış edəcəyinə inandığını söyləyib:
"Artıq indidən avrokuboklar barədə düşünmək olar. Təbii ki, rəqiblərin kimliyindən asılı olmayaraq meydana qələbə üçün çıxacağıq. Keçən il pley-off mərhələsinə qədər irəlilədik və uğurlu nəticəyə imza atdıq. Bu dəfə daha artığını etmək istəyirik. Liqa mərhələsinə vəsiqə qazansaq çox gözəl olardı. Düşünürəm bunun üçün təcrübəmiz var. Artıq heyət möhkəmlənib, futbolçular meydanda bir-birini yaxşı tanıyır.
Qeyd edək ki, ötən gün doğma meydanda "Turan Tovuz"u 1:0 hesabı ilə məğlub edən "Zirə"nin mövsümü ikinci sırada başa vuracağı dəqiqləşib.
