Idman.biz
Azərbaycan millisinin sabiq futbolçusu Zaur Ramazanovun Sport24.az-a müsahibəsində yığmamızın DÇ-2026-nın seçmə mərhələsində Fransa ilə səfər matçı barədə fikirlərini bölüşüb. O, həmçinin "Qarabağ"ın Çempionlar Liqasının Liqa mərhələsində keçirəcəyi növbəti oyunlardan da bəhs edib.
Həmin müsahibəni təqdim edirik:
- Tezliklə yığma komandanın yeni baş məşqçisi bəlli olacaq. Sizcə, bu posta kim gətirilməlidir?
- Bunu illərdir deyirik. Milli ancaq yerli mütəxəssisə tapşırılmalıdır. Kim gətirilirsə, ancaq azərbaycanlı baş məşqçi olsun. Hamımız əcnəbilərlə də yaxşı nəticə əldə edə bilmədiyimizi görmüşük.
- Sizin milli komandada görmək istədiyiniz hansısa yerli mütəxəssis varmı?
- Hazırda kiminsə adını çəkə bilmərəm. Ölkəmizdə baş məşqçi azdır? Pro kateqoriyasına malik 50 mütəxəssis var.
- Komandanı DÇ-2026-nın seçmə mərhələsində Fransa ilə səfər matçı gözləyir. Sizcə, böyükhesablı məğlubiyyətdən qaça biləcəyik?
- Vallah nə deyim. Çox çətin və ağır olacaq. Bu səfərdə nəsə edə biləcəyimizə inanmıram. Təkcə böyükhesablı məğlubiyyət olmasın. Yenə də komandaya uğurlar arzulayıram.
- "Qarabağ" Çempionlar Liqasının əsas mərhələsində ilk qələbəsini qazandı. Bu barədə nə deyə bilərsiniz?
- Tarixi nəticədir. Artıq Avropada "Qarabağ"a hörmət bəsləyirlər. Komanda da bizi sevindirə-sevindirə gedir. Bu nailiyyətlərin ardı gəlsin.
- Sizcə, "Benfika"nı məğlub edəndən sonra növbəti mərhələ haqqında düşünmək olmazmı?
- Məncə, "Qarabağ"ın bunun üçün yetəri qədər təcrübəsi də var. Komanda Avropa Liqasında 1/8 final mərhələsində də oynayıb. Düşünürəm ki, qarşıdakı 7 matçda da xallar əldə olunacaq. Onların pley-offa yüksələcəyini gözləyirəm. Niyə də olmasın?
İdman.biz
