Sport24.az
Noyabrın 20-də "Hypers Guba" ilə anlaşan Zaur Hidayətov artıq komandadan ayrılıb. Sport24.az xəbər verir ki, buna səbəb Quba təmsilçisinin II Liqanın XI turunda "Dinamo"ya 1:4 hesabı ilə yenilməsidi. Bundan başqa qubalılar "polislər"lə matçda adı protokolda olmayan futbolçunun xidmətindən yararlanıblar ki, bu da rəhbərliyin baş məşqçi ilə bağlı qərarına təsir edib.
Məsələ ilə bağlı 47 yaşlı mütəxəssislə əlaqə saxladıq. Hidayətovun yaşananlara reaksiyası belə oldu: "Öncə onu bildirim ki, protokolu mən yox, klub rəhbərliyi doldurub. Oyuna 3 saat qalmış heyəti yazıb onlara vermişəm. Odur ki, protokol səhvində mənim heç bir günahım yoxdu. Postumdan ayrılmağıma gəlincə, nədənsə hamı protokol məsələsini qabardır. Ancaq oyunu uduzmağımız barədə heç kim heç nə danışmır. "Niyə uduzduq, hansı səbəbdən meydanı məğlub tərk etdik?". Bununla maraqlanan yoxdu".
Zaur bəy "Hypers Guba"dan problemsiz ayrıldığını vurğulayıb: "İşimdəm ayrılmağımla bağlı açıqlama vermək istəmirəm. Qarşılıqlı razılıq əsasında yollarımızı ayırdıq".
