Sport24.az
"İlk oyunda gördük ki, ustalıq baxımından "Qarabağ" "Şelburn"dan çox üstündür". Bu sözləri Sport24.az-a açıqlamasında Zaur Həşimov UEFA Çempionlar Liqasının II təsnifat mərhələsində "Qarabağ"ın "Şelburn"a (İrlandiya) qarşı keçirəcəyi cavab oyunundan gözləntilərini açıqlayarkən deyib.
Veteran futbolçu qarşılaşmada möcüzənin olacağına inanmadığını bildirib:
"Düzdür, matçın müəyyən vaxtlarında "Şelburn" təmsilçimizin qapısı qarşısında təhlükəli epizodlar yarada bilirdi. Buna baxmayaraq, "Qarabağ" səfər oyununda 0:3 hesablı qələbə ilə döndü. Bakıda isə hər hansı möcüzənin baş verməsinə inanmıram. "Doğma divarlar" arasında "Şelburn" bir neçə hücum təşkil etsə də, Bakıda belə həmlələrin təşkilində çətinlik çəkəcəklər. "Qarabağ" bütün oyun boyu topa nəzarət edəcək. Əminliklə deyə bilərik ki, mərhələni keçən tərəf "Qarabağ" olacaq".
Qeyd edək ki, "Qarabağ" - "Şelburn" matçı Tofiq Bəhramov adına Respublika stadionunda, saat 20:00-da start götürəcək. Dublində baş tutan ilk oyun Qurban Qurbanovun komandasının 3:0 hesablı qələbəsi ilə yekunlaşıb.
