Idman.biz
Naxçıvan Futbol Federasiyasının prezidenti və "Araz-Naxçıvan" klubunun faktiki rəhbəri Zaur Axundovun Teleqraf-a müsahibəsi
- Oyun barədə fikirləriniz necədir?
- Hələ özümüzə gələ bilmirik. Ağır oyun oldu. Düzdür, hazırda heç nə məlum deyil. Cütün taleyi cavab görüşündə həll olunacaq. Bir tərəfdən də sevinirik ki, komandamız tarixində ilk avrokubok oyununda qələbə qazandı. Təbii ki, bu yarışlar iki oyundan ibarətdir. Cavab görüşünə hazırlaşacağıq.
- Komandanız 0:1 hesabı ilə geridə ikən məyusluq yaşamadınız?
- Yox, mən onda da inanırdım ki, biz bu oyunu uduzmayacağıq. Bu komanda matça yaxşı hazırlaşmışdı. "Aris" də güclü rəqibdir. Azərbaycanı Avropada təmsil edən komandaların arasında ən ağır rəqib bizə düşdü. Buna baxmayaraq, futbolçular xarakter göstərdilər. Üçüncü qolu vurmağa yaxın idik. Hətta yüzdə-yüz iki qol epizodunu boşa verdik. Amma bu, futboldur.
- Oyundan sonra mətbuat konfransında rəqib baş məşqçi çox iddialı danışdı. "Komandam evdə tam fərqli oyun göstərəcək" söylədi...
- Təbii ki, elə deməlidir. Hər bir baş məşqçi ikinci oyundan əvvəl komandasına motivasiya versin. Bizim üçün də səfərdə ağır oyun olacaq.
- Nəticəni bildik, oyunun özündən razı qaldınızmı?
- Mövsümün ilk rəsmi oyunu idi, komandada səhvlər var idi. Bunun üzərində məşqçilər korpusu işləyəcək. Amma belədə, təlim-məşq toplanışından yeni gəlmişdik, istirahət də çox az olmuşdu. Komandanın demək olar ki, 70 faizi dəyişilib. Buna baxmayaraq, məşqçilər korpusunun işi meydanda göründü.
- Yeni oyunçular özlərini doğruldurmu, onları bəyəndinizmi?
- Təbii ki, bəyəndim. Amma mən vaxt verməyi sevmirəm, leksikonumda vaxt vermək sözü yoxdur. Fikirləşirəm ki, bir ay içində oyunçular daha çox uyğunlaşıblar və yaxşı futbol sərgiləyəcəklər.
- İqor Ribeyro "Neftçi"yə tranafer olunub. Növbəti mərhələyə keçsəniz, komandanızda qalacaqmı?
- Təbii ki, o, artıq "Neftçi"nin oyunçusudur. Qabaqcadan danışmayaq. Ribeyro çox vacib futbolçudur. Amma birinci növbədə, "Aris"lə cavab oyununu gözləyirik. Qələbə qazanıb mərhələ keçsək, o zaman "Neftçi"dən təbii ki, xahiş edəcəyik.
- İndidən görünür ki, "Araz-Naxçıvan" növbəti mövsümə çox yaxşı hazırlaşıb, yaxşı transferlərlə güclənib. İndidən çempionluq üçün mübarizə aparacağını düşünmək olar?
- Yox, qabaqcadan demək olmaz. Yeni mövsümdə komanda sayı artıb, 12 komandalı çempionat olacaq. Görünür ki, digər komandalar da gücləniblər. Hələ elita klublarının görünməyən tərəfləri də var. Onu çempionat göstərəcək. Amma bizim əsas fikrimiz "Aris"ə qarşı cavab oyunudur.
İdman.biz
