Zaqreb “Dinamo”su “səkkizliy”ə doğru, “Bavariya” uduzmadığı “Benfika”ya qarşı

Zaqreb "Dinamo"su bizə yaxşı tanışdır.

İdman.biz xəbər verir ki, millimizin hücumçusu Mahir Emrelinin üç mövsüm oynadığı klub "Qarabağ"ın da yayda Çempionlar Liqasına gedən yolunu kəsib.

Liqa mərhələsinin ilk turunda "Bavariya"ya 2:9 hesablı rekord məğlubiyyətdən sonra autsayderlər arasında yer alacağı gözlənilsə də, "Dinamo Zaqreb" ondan sonra uduzmur. Evdə "Monako" ilə heç-heçə edib (2:2), Avstriyada "Zalsburq"a qalib gələn (2:0) Xorvatiya təmsilçisi dünən də Slovakiyada "Slovan"dan güclü olub – 4:1.

İndi Zaqreb "Dinamo"su yeddi xalla 14-cü yerdədir və yalnız mənfi top fərqinə görə onunla eyni xala malik 7-ci yerdəki "Mançester Siti", həmçinin "Yuventus" və "Bayer Leverkuzen" kimi komandalardan geri qalır.

UEFA Çempionlar Liqası liqa mərhələsinin 4-cü turu dünən keçirilən doqquz oyunla start götürüb.
"Dinamo Zaqreb"in böyükhesablı qələbəsindən başqa, "Liverpul"un "Bayer Leverkuzen"ə 4:0 hesabı ilə qalib gələrək 12 xalla təkbaşına liderliyə yüksəlməsi diqqəti çəkir.

"Real"ın İspaniyada "Milan"a uduzmasını (1:3), "Mançester Siti"nin də topa sahibolmada böyük üstünlüyünə baxmayaraq (73 % - 27 %), Portuqaliyada "Sportinq"ə 1:4 hesabı ilə məğlub olmasını günün ən gözlənilməz nəticələri saymaq mümkündür.

"Şturm"a qalib gələn (1:0) "Borussiya Dortmund"un baş məşqçisi Nuri Şahin Bundesliqa yaradılandan bəri ilk yeddi ev oyununda qələbə sevinci yaşayan "sarı-qaralar"ın ilk çalışdırıcısı kimi tarixə düşüb.

Bu gün keçiriləcək daha doqquz oyunla UEFA Çempionlar Liqası liqa mərhələsinin 4-cü turuna yekun vurulacaq.

Tur ərəfəsində lider olan "Aston Villa" yenidən 1-ci pilləyə yüksəlmək üçün Belçikada üç xallı "Brügge"yə azı dörd top fərqilə qalib gəlməlidir.

Digər oyunlardan 8-ci yerdəki "İnter"lə 9-cu "Arsenal"ın qarşılaşması daha çox maraq doğurur. Bundan əvvəl uzaq 2003-cü ildə üz-üzə gələn rəqiblərin o vaxtkı oyunlarında qeyri-adi nəticələr qeydə alındığını da xatırladaq: İngiltərədə "İnter" 3:0, İtaliyada isə "Arsenal" 5:1 hesabı ilə qalib gəlmişdi.

PSJ-nin hazırda Çempionlar Liqasında 23-cü, Madrid "Atletiko"sunun isə 28-ci yerdə qərarlaşmalarını gözlənilməz saymaq olar. Fransada qarşılaşcaq bu komandalardan biri qələbə qazanmaqla öz mövqeyini yaxşılaşdıra bilər.

"Bavariya"nın 25-ci pillədə yer alması da təəccüb doğurur. Almaniya təmsilçisi öz meydanında heç vaxt uduzmadığı "Benfika" ilə 13-cü qarşılaşmada onuncu qələbəsini qazanmağa çalışacaq.

Favoritlərdən "Barselona" da Serbiyada "Srvena Zvezda"ya qalib gəlib ilk "səkkizliy"ə düşməyi hədəfləyir.

Rasim
İdman.biz