Sport24.az
"Hələlik hər şey qaydasındadır. Sonadək liderliyimizi qoruyub çempion olmağa çalışacağıq". Bu sözləri Sport24.az-a açıqlamasında Albaniyanın "Eqnatiya" klubunda legioner həyatı yaşayan Azərbaycan millisinin futbolçusu Zamiq Əliyev deyib.
23 yaşlı müdafiəçi qarşıdakı planlarından söz açıb: "Hədəfim daha yüksək liqalarda çıxış etməkdir. Bunun üçün öz işimə köklənmişəm. Düşünürəm ki, üzərimdə işləməli olduğum çox məqamlar var. Məncə, bir çox çempionatlarda mübarizə aparacaq səviyyədəyəm. Lakin konkret ölkə adı çəkə bilmərəm".
Əliyev qış transfer dönəmində bir neçə klubun onunla maraqlandığını diqqətə çatdırıb: "Azərbaycandan da maraqlanan komandalar var. Lakin rəsmi təklif olmayıb".
Müdafiəçi ölkədən kənarda az azərbaycanlı futbolçunun çıxış etməsi barədə çox danışmaq istəməyib: "Bu, çox geniş mövzudur. Burada bir çox səbəblər var. Konkret olaraq birindən danışsam, düzgün olmaz".
O, son olaraq yığmanın martdakı yoxlama oyunları üçün dəvət gözlədiyini söyləyib: "Düşərgəyə çağırılsam, çox xoşbəxt olaram. Ümid edirəm ki, mən də bu toplanışda şans qazanacağam".
