Yuriy Hura: "Zirə"dən güclü olduğumuzu sübut etmək istəyirik"

"Bakıda hava çox istidir. Bu amil hər 2 komandaya mane olacaq. Moldovada da belədir ".

İdman.biz xəbər verir ki, bunu "Şerif"in baş məşqçisi Yuri Qura deyib.

Ukraynalı mütəxəssis Avropa Liqasının I təsnifat mərhələsinin "Zirə" ilə keçiriləcək cavab oyunundan əvvəl mətbuat konfransında iştirak edib. Hura komandanın yeni transferi "Qəbələ"nin sabiq futbolçusu Əyyub Allaşdan Azərbaycan futbolu haqqında məlumat aldığını bildirib: "Əyyub Allaşla danışmışıq. O, bizə bəzi məlumatlar verdi. Tək "Zirə" ilə bağlı yox, bütün Azərbaycan futbolu ilə bağlı fikir mübadiləsi aparmışıq. Rəqibimizin standart vəziyyətlər zamanı təhlükəli olduğunu bilirik".

Hura püşkatmadan sonra rəqibin "Zirə" olmasına görə sevinmədiklərini etiraf edib: "Püşkdən sonra "Zirə"dən qorxduğumuzu deməzdim. Sadəcə ilk oyunda evdə uduzduq. Sabah vəziyyəti öz xeyrimizə dəyişməyə çalışacağıq. Favorit olmaq bizim oyunumuza təsir etməyəcək. Bunu meydanda sübut etməyə çalışacağıq. "Zirə"dən güclü olduğumuzu sübut etmək istəyirik. Sabahkı oyunda bunun üçün əlimizdən gələni edəcəyik".

"Şerif"in baş məşqçisi həmkarı Rəşad Sadıqovu yaxşı tanıdığını bildirib: "Rəşad Sadıqovu çox yaxşı tanıyırıq. Mənim köməkçim Türkiyədə onunla birlikdə oynayıb. Ondan da məlumatlar almışıq. Rəqib komandanı yaxşı analiz etmişik".

Qeyd edək ki, "Zirə" – "Şerif" oyunu sabah saat 20:00-da start götürəcək.

Emin Ağa
İdman.biz