İdman.biz
"İnanıram ki, bugünkü oyunda qələbə qazanacağıq".
Bunu İdman.bizə "Turan Tovuz"un məşqçisi Yunis Hüseynov deyib.
O, Azərbaycan yığmasının Millətlər Liqasının V turunda Estoniyaya qarşı keçirəcəyi matçı şərh edib. Təcrübəli mütəxəssis bildirib ki, səfərdə bu rəqibə uduzan futbolçularımız revanş almağa borcludurlar: "Estonlarla ilk görüşdə müəyyən səhvlərdən qollar buraxdıq. Amma inanıram ki, bu gün komandamız mütləq qələbə qazanacaq. İnamım böyükdür. Doğma meydanda oynayırıq. Ona görə də üstünlük bizdədir. Futbolçularımız bilir ki, burdan geriyə yol yoxdur. Ola bilər ki, aşağı diviziona düşə bilərik. Əgər C liqasında qalmaq istəyiriksə, qalib gəlməliyik. Yəqin ki, məşqçilər korpusu da Estoniyanın zəif və güclü tərəflərini araşdırıb".
Onun sözlərinə görə, millimiz güc və oyun baxımından rəqibdən xeyli öndədir: "Matçı səbirsizliklə gözləyirik. Heyətdə yeni futbolçular da var və komandanın istəyi də tam başqa olacaq".
Qeyd edək ki, Azərbaycan - Estoniya qarşılaşması Qəbələ şəhər stadionunda saat 18:00-da başlayacaq.
Banuçiçək Hüseynli
İdman.biz
