İdman.biz
"Avropa Liqasının qrup mərhələsində mübarizə aparacaq komandaların heç biri zəif deyil".
Bunu İdman.bizə Azərbaycan millisinin sabiq futbolçusu Yunis Hüseynov deyib.
O, Avropa Liqasının Liqa mərhələsinin püşkünü dəyərləndirib. Hüseynov bildirib ki, "Qarabağ"la yanaşı, hər bir klub eyni səviyyədədir: "Düzdür, bəzilər daha güclüdür. "Ayaks" Niderlandın ən yaxşılarından olub. Lakin indi hansı səviyyədədir, onu deyə bilmərik. Fikrimcə, əvvəlki səviyyədə deyil. Bizə düşən bütün komandalara qarşı oynamaq mümkündür. "Malmö" (İsveç) və FCSB-nin (Rumıniya) gücünə bələdik, qələbə qazanmaq mümkündür. Burada əsas məqsəd maksimum xal toplamaqdır. "Tottenhem" (İngiltərə), "Olimpiakos" (Yunanıstan) bizim üçün tanış rəqiblərdir. Düşünürəm ki, yunanlar ötən illərə nəzərən daha da güclənib. Nəticələrinə baxdığımız zaman bunu görmək olur. "Tottenhem" isə İngiltərənin ən yaxşı komandalardan biridir. Bu komandalar arasında elə məhz londonlular favorit sayılır. "Bodo Qlimt" (Norveç) ilə oyunumuz soyuq aylara düşür. O qədər də güclü rəqib deyil. "Elfsborq" da (İsveç) "Qarabağ"a uyğun rəqibdir".
Hüseynovun sözlərinə görə, yeni format heç də onda xoş təəssürat yaratmayıb.
Qeyd edək ki, Liqa yolunda ilk 8 yeri tutanlar 1/8 finala adlayacaq, 9-24-cü pilələri tutanlar pley-offda oynayacaq.
Banuçiçək Hüseynli
İdman.biz
