Yunis Hüseynov: “Neftçi”də dəyişikliyə baxmayaraq, oyun baxımından heç nə yoxdur”

"Bütün oyunları izlədim. "Zirə" 3-4 gün öncə "Araz Naçıvan"la (0:1) təxirə salınmış oyuna çıxdığı üçün futbolçuları yorğun görünürdü".

Bunu İdman.bizə Azərbaycan millisinin sabiq futbolçusu Yunis Hüseynov deyib.

Təcrübəli mütəxəssis Misli Premyer Liqasının 13-cü turunun matçlarını şərh edib. O bildirib ki, "Qarabağ" - "Zirə" (4:0) qarşılaşmasında Ağdam təmsilçisinin Norveçdəki uğurunun da xüsusi payı olub: "Qurban Qurbanovun komandası güclüdür. Bu səbəbdən də nəticə belə alındı. İlk hissədə olduğu kimi ikinci yarıda da "Zirə" qapıya demək olar ki, yaxın düşmədi. Fikrimcə, bu, yorğunluqdan idi".

Hüseynov bildirib ki, "Araz-Naxçıvan" - "Sumqayıt" (1:0) qarşılaşmasında meydan sahibləri çox yaxşı oyun nümayiş etdirib: "Bölgə təmsilçisinin yaxşı oyunçuları var. Elmar Baxşıyev "Qəbələ"də tanıdığı futbolçuları komandaya cəlb edib. Onlar da özlərini yaxşı tərəfdən göstərirlər və hər zaman yaxşı nəticəyə köklənirlər. Bu da hər zaman alınır. Vaqif Cavadov "Sumqayıt"ın "sükanı arxasına" 4 matçdır keçib və bunun iksində qələbə qazanıb. Yaxşı oynayırlar".

Onun sözlərinə görə, "Sabah" - "Kəpəz" (2:2) qarşılaşmasında Bakı təmsilçisi favorit hesab olunsa da, gəncəlilər rəqibdən xal almağı bacarıblar: "Kəpəz" son oyunlarda özünü yaxşı tərəfdən göstərir. Qalib gəlməyə də layiq idilər. Hardasa istəklərinə nail olub, xal götürdülər".

Hüseynov "Səbail" - "Turan Tovuz" (1:1) matçının da maraqlı alındığını deyib: "Bakılılar turnir cədvəlində son sıralardadır. "Turan Tovuz" isə yerini möhkəmləndirmək istəyir. Əgər Tovuz təmsilçisi matç zamanı 11 metrlik cərimə zərbəsindən istifadə edə bilsəydi, ikinci hissədə oyun tamam başqa cür ola bilərdi. "Səbail"in baş məşçqi dəyişikliyi oldu. Bu cür hadisələr futbolçulara təsir edir. Amma hər şeyə rəğmən, "Səbail"in oyunçuları çox istəkli görünürdülər".

O, "Neftçi" - "Şamaxı" (2:2) matçı barədə danışmağın çətin olduğunu da etiraf edib: "Ağ-qaralar"da son zamanlar xeyli dəyişikliklər baş verib. Daim "Neftçi" azərkeşi olmuşam, hər zamanda qələbə qazanmalarını istəmişəm. Lakin əfsuslar olsun ki, bu klub ümidləri doğrultmur. Dəyişikliklərə baxmayaraq, oyun baxımından heç nə yoxdur. "Neftçi" flaqmandır və belə də qalmalıdır. Heyətdə bəzi şeylər məni qane etmir. Baş məşqçidən başqa, kiminsə orda göstəriş verməsi yaxşı görünmür. "Şamaxı" isə layiqli mübarizə apardı, geri düşməsinə baxmayaq istədiyi xalı aldı".

Qeyd edək ki, Premyer Liqada 13 turdan sonra "Qarabağ" 31 xalla vahid liderdir. Ağdam klubu rəqiblərindən 1 oyun da az keçirib.

Banuçiçək Hüseynli
İdman.biz