Idman.biz
Niderland futbolunun canlı əfsanəsi Yohan Kroyfun oğlu Yordi tezliklə "Qarabağ" ilə "Ayaks" arasında keçiriləcək Çempionlar Liqasının Bakı oyununda iştirak edə bilər.
İdman.Biz-in "De Telegraaf" nəşrinə istinadən verdiyi məlumata görə, Yordi Kroyf "Ayaks"da Aleks Krousun əvəzləyəcəyi idman direktoru vəzifəsinə əsas namizədlərdən biridir.
Hazırda Kroyf İndoneziya millisinin texniki məsləhətçisi kimi çalışır və "Barselona" da daxil olmaqla müxtəlif klublarda idman direktoru kimi təcrübəyə malikdir. Bu amil onu potensial namizədlər siyahısında daha üstün mövqeyə çıxarır. Təyinat rəsmiləşəcəyi halda, onun Çempionlar Liqasının səfər matçlarında, o cümlədən Bakıda "Qarabağ"a qarşı görüşdə komandaya müşayiətçi qismində qatılması istisna edilmir.
"Ayaks" rəhbərliyi artıq açıq şəkildə bildirib ki, əvvəlcə yeni idman direktoru təyin olunacaq və yalnız bundan sonra onunla birlikdə əsas məşqçi məsələsinə baxılacaq. Səhmdarlarla keçirilən görüşdə klubun baş direktoru Menno Helen vurğulayıb ki, klub uzunmüddətli idarəetmə modeli qurur və idman blokunun strukturu təsdiqlənmədən baş məşqçi seçimində tələskənlik göstərmək niyyətində deyil.
Hazırda komandaya baş məşqçinin səlahiyyətlərini icra edən Fred Qrim rəhbərlik edir. O, Con Heytinqa ilə yollar ayrıldıqdan sonra bu vəzifəni icra edir. Niderland mediası qeyd edir ki, Qrim yaxın perspektivdə "Ayaks"ın sükanını əlində saxlamaqda davam edəcək. Məhz onun Çempionlar Liqasının həlledici oyunlarına, o cümlədən Bakıda "Qarabağ"la baş tutacaq qarşılaşmaya komandanı hazırladığı bildirilir.
Xatırladaq ki, Ağdam və Amsterdam klubları arasında görüş dekabrın 10-da Bakıda, Tofiq Bəhramov adına Respublika Stadionunda keçiriləcək. Çempionlar Liqasının əsas mərhələsinin dörd turundan sonra "Qarabağ"ın aktivində 7 xal var və komanda turnir cədvəlində 15-ci yerdə qərarlaşıb. "Ayaks" isə heç bir xal toplamadan son - 36-cı pillədə yer alır.
Teymur Tuşiyev
