"Mövsüm başa çatandan sonra "Kəpəz"də qalmaq istəyirdim. Sadəcə, Gəncə təmsilçisindən təklif gec gəldi. Ona görə də bir qədər gözləməli oldum". Bu sözləri Sport24.az-a açıqlamasında Yeqor Xvalko deyib.
Belaruslu futbolçu mövsümlərarası fasilədə "Səbail"ə keçəcəyi ilə bağlı söz-söhbətə də aydınlıq gətirib: "Çempionat başa çatandan sonra "Kəpəz"də bir müddət susqunluq oldu. Həmin ərəfədə "Səbail"dən təklif gəldi. Amma şərtlərdə ortaq məxərəcə gələ bilmədik. Yaxşı ki, Bakı klubuna keçidim alınmadı. Gəncədə yaşamaq və bu şəhərin komandasının şərəfini qorumaq xoşdu. Bu qədim şəhər çox xoşuma gəlir".
Qeyd edək ki, 27 yaşlı müdafiəçi 2022-ci ildən "sarı-göylər"in şərəfini qoruyur. Xvalko "Kəpəz"in heyətində Premyer Liqada 62 oyuna çıxıb və 2 qolla yadda qalıb.
ABDULLA İSMAYILOĞLU